ԿԳՆ-ն առաջարկում է փոխել բուհերի լիցենզավորման կարգն ու կրճատել դրանց քանակը

Հայաստանի կրթության և գիտության նախարարությունն առաջարկում է փոխել բուհերի լիցենզավորման գործընթացը և կրճատել դրանց քանակը: Ազգային ժողովի գիտության, կրթության, մշակույթի, երիտասարդության և սպորտի հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում այս մասին հայտարարել է ՀՀ կրթության և գիտության նախարար Լևոն Մկրտչյանը:

Նախարարի փոխանցմամբ՝ Հայաստանն ունի 87 հազար ուսանող և 66 համալսարան, ինչը մտահոգիչ է, և կարիք կա կրճատման:

Նա ընդգծեց, որ այս խնդիրները լուծելու համար պետք է լիցենզավորման գործընթացը փոխել: Խնդրի լուծման համար նախարարն առաջարկում է մանկավարժական ինստիտուտներում չդնել կադաստրային գործ. «Ի՞նչ ենք արել մինչև այսօր. ավտոմատ տվել ենք ինստիտուցիոնալ հավատարմագրումը, բայց առարկայական, մասնագիտական հավատարմագրման պիտի գնանք: Նյութերն արդեն պատրաստված են: Մեկ տարվա ընթացքում պետք է անցնենք դրան, որպեսզի մանկավարժական ինստիտուտներում կադաստրային գործ չդրվի, և Հայաստանում  ունենանք ուժեղ, բարձրագույն կրթական հաստատություններ, որտեղ ուսանողը իր շարժունակությունը կստանա», – նշեց նախարարը:

«Եթե նայում ենք անցած տարվա բակալավրիատի ցուցանիշներն, ապա մոտ 70 տոկոսը հումանիտար մասնագիտության ներկայացուցիչներ են: Եթե արմատապես չբարելավենք վիճակը և բնական գիտությունների դոմինանտության չբերենք, Հայաստանը կդադարի գիտական տարածք դառնալ և սպասարկման տարածքի կվերածվի: Սա լուրջ վտանգ է, ու լուրջ կրթական բարեփոխումներ պիտի անենք այս խնդիրները լուծելու համար»,- նշեց նախարարը: