Կառավարության դիրքորոշումը վիրավորական է․ որոշել եմ դուրս գալ պաշտպանության հանձնաժողովից․ Գեղամ Նազարյան․ ՏԵՍԱՆՅՈՒԹ

ԱԺ պաշտպանության և անվտանգության հարցերի մշտական հանձնաժողովի նիստում քննարկվում է «Հայաստան» խմբակցության կողմից առաջարկված «Հայրենիքի պաշտպանության համար զոհված զինծառայողի ընտանիքի անդամների երաշխիքների մասին» նախագիծը։ 

Նշենք, որ «Հայրենիքի պաշտպանության համար զոհված զինծառայողի ընտանիքի անդամների երաշխիքների մասին» օրենքում փոփոխությունների նախագծով առաջարկվում է նոր երաշխիքներ սահմանել, մասնավորապես, հիփոթեքային վարկի մարման, առողջապահական, կրթական, կոմունալ և այլ ծախսերի փոխհատուցման մասով։ 

Նախագծի հիմնական զեկուցող, ԱԺ պաշտպանության և անվտանգության հարցերի մշտական հանձնաժողովի անդամ Գեղամ Նազարյանը հայտնեց` կառավարությունը մերժել է նախագիծը` նշելով, թե բյուջեի վրա այն լրացուցիչ բեռ է լինելու։ 

Եվրատեսիլի ու կազինոյի համար փող կա՞, իսկ նահատակված զինծառայողների ընտանիքների համար չկա՞. հարց հնչեցրեց պատգամավորը։

«Այս նախագծի ընդունմամբ զոհվածների ընտանիքներն այլևս գլուխ չեն ջարդի` մտածելու, թե ինչպես կամ ում օգնությամբ են վճարելու մինչև պատերազմը վերցված հիփոթեքային վարկը, ինչպես են վճարելու բուժման ծախսերը, գույքահարկը, հողի հարկն ու կոմունալները։ Հերոսի կնոջը կօգնենք, որ երեխաների ուսման հարցերի հետ կապված անհանգստություններ կամ վախեր չունենան․․․»,- նշեց պատգամավորը։ 

Նազարյանը հավելեց, որ կառավարության դիրքորոշումը վիրավորական և անհասկանալի է իր համար, ինչի պատճառով էլ որոշել է դուրս գալ հանձնաժողովից։ 

Նշենք, որ կառավարությունը բացասական եզրակացություն է տվել նախագծին։

Մանրամասները՝ տեսանյութում։