30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
«Գյումրին ալամ աշխարհի չեմպիոն քաղաքն է, կբացենք սպորտի թանգարան»․ Գյումրու քաղաքապետ
Քաղաքականություն
01.01.2023 | 11:56
Գյումրիում 2023 թվականին կբացվի սպորտի թանգարան, այն կտեղակայվի զբոսաշրջային գոտիներից մեկում՝ կայարանամերձ հրապարակում։
Այս մասին մեզ հետ զրույցում տեղեկացրեց Գյումրու քաղաքապետ Վարդգես Սամսոնյանը։
«Ես ամենաշատ չեմպիոններ ունեցող քաղաքի ղեկավարն եմ, Գյումրին ալամ աշխարհի չեմպիոն քաղաքն է, այդ պատճառով էլ ուզում ենք սպորտի թանգարան ունենալ։
Կայարանամերձ հրապարակում ոստիկանության նախկին շենքն ենք ուզում վերցնել։ Մեր սպորտսմենների ունեցած նվաճումներն ու ձեռքբերումները ցույց տանք համայն աշխարհին, հյուրերին, գան, տեսնեն, թե թվով քանի սպորտսմեն որ թվականին ենք ունեցել, օլիմպիական, աշխարհի, Եվրոպայի չեմպիոններն ովքեր են։
Իմ կարծիքով ողջ աշխարհում չկա նման քաղաք, որ ունենալով ոչ շատ բնակչություն, ունենա այդքան շատ չեմպիոններ։ Ի վերուստ է մեզ տրված, մեր տղաները ոչ լավ պայմաններ ունենալով, սակայն կամքի ուժ ունենալով, նման հաջողություններ են արձանագրել»,-ասաց Վարդգես Սամսոնյանը։
Գյումրու քաղաքապետը նշեց, որ ոստիկանության շենքը համայնքապատկան չէ, այն ՀՀ կառավարության պետական գույք է համարվում, բանակցում են, որ տրամադրեն սպորտի թանգարան հիմնելու համար։
«Հենց տրամադրեցին, աստիճանաբար, սուբվենցիոն ծրագրով կամ ֆինանսական այլ միջոցներով կփորձենք իրականացնել Գյումրու համար կարևոր այդ ծրագիրը»,-ասաց քաղաքապետը։
Արմիկ Մովսիսյան
