16.07.2026 | 01:03
ԱԱ-2026․ Եզրափակիչում՝ Իսպանիա – Արգենտինա․ ՏԵՍԱՆՅՈՒԹ
ԲԴԽ-ն դատավոր Մնացական Մարտիրոսյանին հանեց Հակակոռուպցիոն դատարանի թեկնածուների ցուցակից
Հասարակություն
30.12.2022 | 17:00
Այսօր Բարձրագույն դատական խորհուրդը խորհրդակցական սենյակում բաց քվեարկությամբ որոշել է դատավորների թեկնածուների հավակնորդների ցուցակի հակակոռուպցիոն մասնագիտացման բաժնի կոռուպցիոն հանցագործությունների քննության ենթաբաժնից հանել Մնացական Մարտիրոսյանին՝ «Հայաստանի Հանրապետության դատական օրենսգիրք» սահմանադրական օրենքի 113-րդ հոդվածի 1-ին կետի 2-րդ մասի հիմքով, տեղեկանում ենք ԲԴԽ-ից։ Օրենսգրքի նշյալ հոդվածը սահմանում է, որ դատավորների թեկնածուների հավակնորդների ցուցակում ընդգրկված անձը հանվում է ցուցակից, եթե այդ մասին գրավոր դիմում է ներկայացվել։
Այսինքն՝ Մնացական Մարտիրոսյանը կշարունակի պաշտոնավարումը որպես Երևան քաղաքի առաջին ատյանի ընդհանուր իրավասության դատարանի դատավոր և չի տեղափոխվի Հակակոռուպցիոն դատարան:
Հիշեցնենք, ընդամենը օրեր առաջ Factor.am-ն անդրադարձել էր թեմային՝ հրապարակելով դատավորին ուղղված գրավոր հարցման պատասխանները։ Ավելի վաղ իրավապաշտպանները և քաղաքացիական հասարակությունը հայտարարություն էին տարածել՝ դատապարտելով ԲԴԽ-ի որոշումը Մնացական Մարտիրոսյանին Հակակոռուպցիոն դատարանի դատավորի թեկնածու առաջադրելու առնչությամբ։
