Անհայտ ծագման մսի վաճառք՝ հենց փողոցում․ տոնական առևտրի մութ կողմը․ ՏԵՍԱՆՅՈւԹ

Սասունցի Դավիթ երկաթուղային կայարանի հարևանությամբ առևտրականները միսը վաճառում են խանութից էժան գնով։ Բայց ի՞նչ պայմաններում է կատարվել կենդանիների մորթը, արդյո՞ք սպանդանոցում, ինչպես օրենքն է պահանջում՝ հետաքրքրվում ենք վաճառողներից։

«Մենք չգիտենք, առնում ենք»,- ասաց վաճառողներից մեկը։

Մսավաճառները նաև չներկայացրին 5-րդ ձևի անասնաբուժական վկայականը․ այս փաստաթուղթը պիտի վկայեր, որ միսն անվտանգ է, ենթարկվել է անասնաբուժասանիտարական փորձաքննության, այսինքն՝ սպանդանոցային մորթ է իրականացվել։

Շուկայի այցելուներից մեկը՝ Գառնիկ Աթաբեկյանն ասում է` որքան էլ դրսում վաճառվող միսն ավելի մատչելի լինի, միևնույն է՝ չի գնում։ Չի հասկանում, թե ինչպես են մարդիկ հակահիգիենիկ պայմաններում վաճառվող միս գնում։

Factor TV-ի նկարահանող խմբին նկատելուն պես շուկայի աշխատակիցները վաճառողներից պահանջեցին հավաքել ապրանքը․ մսավաճառների սեղանները սկսեցին դատարկվել։ Շուկայի աշխատակիցը, որը նկարահանվել չցանկացավ, պնդեց, թե չգիտեն՝ ինչպես են մսավաճառները հայտնվել այստեղ։

«Ձեռքի հետ բերել-դրել ու վաճառում են»,- ասաց շուկայի աշխատակիցը։

Երևանի քաղաքապետարանի առևտրի և ծառայության վարչության պետ Հովիկ Սաֆարյանը Factor TV-ի հետ զրույցում ասաց, որ Ամանորին ընդառաջ՝ փողոցային առևտրի ծավալները մեծանում են, բայց իրենք վերահսկում են և առգրավում ապրանքը։

Քաղաքապետարանի պաշտոնյան ասաց՝ կոնկրետ այս հատվածում ստուգումներ չեն արել, բայց խոստացավ՝ կվերահսկեն։ Օրենքը շրջանցելու համար տուգանք է սահմանված 70-100 հազար, երկրորդ անգամ խախտելու դեպքում՝ 200 հազար դրամի չափով։ Միայն 2022 թվականին բացօթյա առևտրի 2000-ից ավելի արձանագրություն է կազմվել, բայց դա էլ իրավիճակը չի փոխում․ ստուգայցերից րոպեներ անց պատկերը նույնն է։

Պարզվեց՝ մեր նկարահանման պահին ՍԱՏՄ տեսուչները շուկայի հարևանությամբ գործող խանութներում էին։ Այնտեղ էլ բազմաթիվ խախտումներ էին արձանագրվել։ Մսեղիք վաճառողները թեև ունեցել են 5-րդ ձևի անասնաբուժական վկայական, բայց տեսուչներն արձանագրել են, որ մսի վաճառքը պատշաճ պայմաններում չի իրականացվում։

Երևանի քաղաքապետարանից մեզ ասացին, որ շուկայի տնօրինությանը զգուշացրել են, նրանք էլ վստահեցրել են, որ մսի վաճառք այլևս չի իրականացվի։

Մանրամասները՝ տեսանյութում։

Արփի Հակոբյան