16.12.2025 | 12:22
Նշան Խաչատրյանը նշանակվել է Ամրավիրի մարզի ընդհանուր իրավասության դատարանի դատավոր
«Լրագրողներ առանց սահմանների». մեկ տարվա ընթացքում աշխարհում 59 լրագրող է սպանվել
Քաղաքականություն
29.12.2022 | 22:56
Աշխարհում 2022 թվականին առնվազն 59 լրատվամիջոցների աշխատակիցներ են մահացել իրենց աշխատանքը կատարելիս։ Նրանց 80 տոկոսը սպանվել է դիտավորյալ։ Նման տվյալներ է հրապարակել «Լրագրողներ առանց սահմանների» (RSF) միջազգային կազմակերպությունը, փոխանցում է DW-ի ռուսական ծառայությունը։
Մեքսիկան չորրորդ տարին անընդմեջ շարունակում է մնալ լրագրողների համար ամենավտանգավոր երկիրը։ Անցած տարում այստեղ սպանվել է առնվազն 11 լրագրող, որոնք լուսաբանում են զգայուն թեմաներ, որոնցից է կազմակերպված հանցավորության խնդիրը: Եվս կես տասնյակ դեպքերում RSF-ն առայժմ չի կարողացել ապացուցել կապը մեքսիկացի լրագրողների մահվան և նրանց աշխատանքի միջև:
Ուկրաինան ևս 2022 թվականին դարձել է լրատվամիջոցների աշխատողների համար ամենավտանգավոր երկրներից մեկը։ Նշվում է, որ ռուսական ագրեսիայի պատճառով այս տարի արտասահմանյան գործուղումների ժամանակ ավելի շատ լրագրողներ սպանվել, քան երբևէ։ Նշանավոր դեպքերից են մարտի 13-ին ռուսական ուժերի կողմից ուկրաինացի լուսանկարիչ Մաքսիմ Լևինի սպանությունը և ֆրանսիացի օպերատոր Ֆրեդերիկ Լեկլերկ-Իմհոֆի մահը, որը սպանվել է բեկորներից Ուկրաինայի արևելքում նկարահանումների մեկնելու ճանապարհին:
Ավելի վաղ «Լրագրողներ առանց սահմանների» կազմակերպությունը նաև գնահատել էր, որ 2022 թվականին աշխարհում առնվազն 65 լրատվամիջոցի աշխատակից է առևանգվել։ Մասնավորապես, ուկրաինական UNIAN լրատվական գործակալության լրագրող Դմիտրի Խիլյուկին վերջին անգամ տեսել են մարտի 4-ին Կիևի մարզի Դիմեր գյուղում, որն այն ժամանակ գտնվում էր ՌԴ ԶՈւ հսկողության տակ։ Խիլյուկի հետագա ճակատագրի մասին ոչինչ հայտնի չէ։ «Լրագրողներ առանց սահմանների» կազմակերպության տվյալներով՝ Խիլյուկին տեղափոխել են Ռուսաստան։
Բացի այդ, դեկտեմբերի 1-ի դրությամբ՝ աննախադեպ թվով լրագրողներ՝ առնվազն 533, բանտարկվել են ամբողջ աշխարհում: Նման դեպքերի կեսից ավելին գրանցվել է հինգ երկրներում՝ Չինաստանում, Մյանմարում, Իրանում, Վիետնամում և Բելառուսում։
RSF-ի վերջին զեկույցը նշում է պատերազմի սկզբից ի վեր Ռուսաստանում լրագրողների աշխատանքային պայմանների զգալի վատթարացում:
«Երկրում մնացած ԶԼՄ-ների աշխատակիցների մեծ մասը ստիպված է աշխատել ընդհատակյա՝ դրակոնյան պատիժների սպառնալիքի ներքո. ռուսական բանակի մասին «կեղծ տեղեկություններ» տարածելու համար նրանց սպառնում է մինչև 15 տարվա ազատազրկում»,- ասվում է փաստաթղթում։
Ընդհանուր առմամբ, դեկտեմբերի 1-ի դրությամբ՝ Ռուսաստանի Դաշնությունում ազատազրկված է 18 լրագրող։
Տաթև Ֆռանգյան
