Հասարակություն
27.12.2022 | 18:17
HelpCourt․am-ն ամփոփել է 2022 թվականի ընթացքում դատավորների վարկանշավորման գործընթացը, համաձայն որի՝ «թափանցիկ ձեռք 2022» մրցանակը ստացել է Երևանի ընդհանուր իրավասության դատարանի դատավոր Արման Հովհաննիսյանը։ Սա նշանակում է, որ Հովհաննիսյանն այս տարվա ամենաբարձր գնահատված դատավորն է։ Helpcourt-ում դատավորներին գնահատում են փաստաբանները։ Վարկանշավորմանը մասնակցում է 283 դատավոր։ Ամենաբարձր գնահատված Արման Հովհաննիսյանի վարկանիշը 148 է, երկրորդ տեղում դատավոր Ռուստամ Մախմուդյանն է, երրորդում՝ Դավիթ Հարությունյանը, չորրորդ տեղում դատավոր Դավիթ Բալայանն է, հինգերորդում՝ Սերգեյ Մարաբյանը։
Թափանցիկ ձեռք մրցանակը ստանալիս դատավոր Արման Հովհաննիսյանը նշել է, որ թեև դժվարին ժամանակներ են՝ դատական իշխանության անկախության և թափանցիկության ուղղությամբ փաստաբանական համայնքի շարունակական ակտիվությունն ու նախաձեռնողականությունը միմիայն ոգևորիչ և հուսադրող է:
Շնորհակալություն եմ հայտնում բոլորին մասնակցություն ունենալու և գնահատական տալու համար: Յուրաքանչյուրիդ գնահատականը պարտավորեցնող է, ուստի կանեմ առավելագույնն՝ այն բարձր պահելու համար: Ցանկանում եմ շնորհակալություն հայտնել նաև HelpCourt դատավորների վարկանիշավորման համակարգին և նախագծի հեղինակ Լ.Սահակյանին՝ տարիներ շարունակ նման հետևողական աշխատանքի և դատական իշխանության նկատմամբ վստահություն ձևավորելու ուղղությամբ ձեռնարկված արդյունավետ քայլերի համար: Միաժամանակ, չեմ կարող իմ երախտագիտությունը չհայտնել աշխատակազմիս՝ մշտապես իմ կողքին լինելու և բարեխիղճ աշխատանք կատարելու համար»,- ասել է դատավոր Արման Հովհաննիսյանը։
