Ադրբեջանը սպառնալիքներով կոնֆլիկտը սրում է, ՌԴ-ն չի արձագանքում․ ՀՀ-ն ի՞նչ բանակցի իրենց հետ․ Կարեն Սարգսյան. ՏԵՍԱՆՅՈՒԹ

Սոցիոլոգ Կարեն Սարգսյանն ասում է՝ եռակողմ չկայացած հանդիպումից մեծ սպասելիքներ անհնար էր ունենալ․ «Ռուսաստանում կա թե՛ տնտեսական ստագնացիա, թե՛ Պուտինի ղեկավարած պետությունն Ուկրաինայի դեմ պատերազմում է մեծ կորուստներ ունեցել։ Այս գիշեր Էնգելսում ռազմական օդանավերի օդանավակայանն է պայթեցվել՝ 850 ք/կմ, այս ամենը ցույց է տալիս, որ ՌԴ-ն ունակ չէ իր անվտանգային խնդիրները լուծել, ինչպես նաև Լաչինի միջանցքում, այսպես կոչված, խաղաղապահների վարքը և դրանից բխող հայտարարությունները թույլ չեն տալիս որևէ կերպ նույնիսկ ենթադրել, որ Պուտինն ունակ է լինել անվտանգության երաշխավոր»։

Կարեն Սարգսյանի գնահատմամբ՝ ՌԴ գործող նախագահը չի կարող նաև միջնորդ լինել հայ-ադրբեջանական հարաբերություններում․ «Ակնհայտ է, որ թե՛ նախորդ շաբաթ, թե՛ դեկտեմբերի 3-ից սկսած Լավրովի պրոադրբեջանական հայտարարությունները մեզ թույլ են տալիս ենթադրել, որ եթե անգամ հանդիպում լիներ էլ, դա չէր լինելու եռակողմ, այլ՝ երկկողմ, այսինքն՝ Հայաստանն ընդդեմ սելջուկ-բոլշևիկյան կողմի»։

Օրեր առաջ էլ՝ դեկտեմբերի 23-ին Մոսկվայում պիտի կայանար արտգործնախարարներ Լավրով-Միրզոյան-Բայրամով եռակողմ հանդիպումը, բայց ՀՀ ԱԳ նախարարը չմեկնեց ՌԴ՝ պատճառաբանելով, որ զբաղված են ԼՂ-ի՝ այս պահին եղած խնդիրներով։

«Ազատություն» ռադիոկայանի հարցին ի պատասխան՝ Արարատ Միրզոյանն ասել է․ «Դժվար է կառուցողական և արդյունավետ հանդիպումներ ունենալ չդադարող սպառնալիքների և ուժի գործադրման նորանոր դրսևորումների պայմաններում»:

Ակնարկն ո՞ւմ է ուղղված։ Ըստ սոցիոլոգի՝ ոչ թե սա ակնարկ է, այլ բաց տեքստ Արարատ Միրզոյանից։

«Ադրբեջանը մշտապես սպառնալիքներ է հնչեցնում, մշտապես կոնֆլիկտը սրում է, մշտապես հակահումանիտար գործողությունների է գնում։ Միաժամանակ, դեկտեմբերի 3-ից մինչև 23-ը ՌԴ-ն ուներ բավականին շատ ժամանակ, որպեսզի արձագանքեր դրանց։ Ի վերջո, ՌԴ-ի խաղաղապահներն են կանգնած Արցախում։ Եթե ՌԴ-ն չի արձագանքում, ինչո՞ւ պետք է ՀՀ-ի ներկայացուցիչը գնար Ռուսաստան։ Եվ երկրորդ՝ ես չեմ տեսնում Ռուսաստանը որպես բանակցությունների հարթակ, քանի որ, մեծ հաշվով, ՌԴ-ի «խաչով թաղվեցին» խաղաղությունը և բոլոր բանակցությունները»,- ասաց Կարեն Սարգսյանը։

Հարցազրույցն ամբողջությամբ՝ տեսանյութում։

Ռոբերտ Անանյան