Վոլկովի տեղակալը եկել է բանակցելու Արցախ մեկնողների հետ. նա դեմ է լրագրողների մասնակցությանը․ ՏԵՍԱՆՅՈւԹ

Այսօր առավոտյան Երևանի Հանրապետության հրապարակից մի խումբ ակտիվիստներ ավտոերթով շարժվեցին դեպի Ստեփանակերտ։

Նախաձեռնության հեղինակները դեռ մոտ 1 շաբաթ առաջ էին հայտարարել, որ մտադիր են արցախցի փոքրիներին ամանորյա նվերներ տանել։

Հիշեցնենք՝ կեղծ բնապահպանական պատրվակներ ներկայացնելով՝ մի խումբ ադրբեջանցիներ Լաչինի միջանցքը փակ են պահում արդեն 2 շաբաթ։ Արցախը Հայաստանին կապող միակ ճանապարհի փակ լինելը հումանիտար խնդիրների պատճառ է դարձել․ Ստեփանակերտում նկատվում է սննդի, դեղորայքի, վառելիքի պակաս, ավելի քան 1000 արցախցիներ՝ այդ թվում երեխաներ, չեն կարողանում ՀՀ-ից վերադառնալ իրենց բնակավայրեր։

Նշենք, որ Ստեփանակերտ շարժվելու նպատակով ավտոերթ կազմակերպած ակցիայի մասնակիցներին ՀՀ ոստիկանության ներկայացուցիչը հայտնել էր․ «2-3 հոգի մեր ուղեկցությամբ, հիմնականում այն մարդիկ, ովքեր ի վիճակի են բանակցելու ռուսների հետ, գնում ենք ռուսական կողմ, հնարավոր է նաև լրագրողներ: Եթե ռուսները թույլ տան, մենք խնդիր չունենք»։

Նախաձեռնության հեղինակներից Հայկ Բարսեղյանը Factor.am-ի հետ զրույցում ընդգծել էր․ «Տեղեկություններ կան, որ ռուս սահմանապահները, ավելին՝ ադրբեջանցիները թողնելու են անցնենք, բայց մենք պայման ունենք․ մենք պահանջելու ենք, որ ճանապարհը լիարժեք բացվի, ադրբեջանցի «դերասանները» անցնեն պատնեշի այն կողմը, ռուսները պատ կազմեն, և մենք առանց ուղեկցողների անցնենք»։

Երևանից Արցախի ուղղությամբ մեկնող ավտոերթի մասնակիցները հասել են Գորիս-Ստեփանակերտ ճանապարհի առաջին, հայկական անցակետին։ Խաղաղապահ զորախմբի ղեկավար Անդրեյ Վոլկովի տեղակալը եկել է բանակցելու Արցախ մեկնողների հետ․ նա դեմ է լրագրողների մասնակցությանը։ Բանակցությանը մասնակցում է քաղաքացիներից 4-ը։

Մանրամասները՝ տեսանյութում։