ԲԴԽ-ն դադարեցրեց դատավոր Աննա Փիլոսյանի լիազորությունները

Բարձրագույն դատական խորհուրդը քիչ առաջ որոշեց էական կարգապահական խախտման հիմքով դադարեցնել դատավոր Աննա Փիլոսյանի լիազորությունները։ Փիլոսյանի նկատմամբ կարգապահական վարույթը հարուցվել էր փաստաբան Գայանե Պապոյանի՝ ֆեյսբուքում կատարած գրառման առիթով։

Ըստ գրառման դատավոր Աննա Փիլոսյանը պարզեցված կարգով քննված գումարի բռնագանձման պահանջի վերաբերյալ գործով կայացված վճիռը տրամադրում է վճռի հրապարակումից 2 տարի անց, այն էլ՝ միայն դիմումի հիման վրա, և այս ընթացքում պարտապան ընկերությունը հասցրել է սնանկ ճանաչվել։

Կարգապահական գործի քննության ընթացքում դատավոր Փիլոսյանը նշել է, որ իր համար անընդունելի է այն, ինչ տեղի է ունեցել և բարձրացրել դատարանների ծանրաբեռնվածության հարցը։

Դատավորը նշել է, որ Երևանի ընդհանուր իրավասության դատարանի դատավորը ծանրաբեռնված է առնվազն թույլատրելիից եռակի անգամ ավելի, և որպես հիմնավորում ներկայացրել թվային տվյալներ։ Ըստ այդմ՝ դատավոր Փիլոսյանի դատավորի վարույթում գտնվող գործերից 2020թ դատական քննության առարկա է դարձվել 1530 քաղաքացիական գործ, որից ավարտվել է 1019-ը, 2021թ.՝ 2663 քաղաքացիական գործից՝ 1638-ը, քննվել և լուծվել են 1027 արբիտրաժային գործեր, 1765 վճարման կարգադրություն արձակելու վերաբերյալ դիմումներ։ 2022 թվականին՝ այսօրվա դրությամբ, ստացվել է 2182 գործ, ևս 1012-ը՝ փոխանցվել նախորդ տարվանից , ու ընդհանուր առմամբ 3396 քաղաքացիական գործից միայն 930 գործ է փոխանցվելու 2023 թվական։

ԲԴԽ-ն, այնուամենայնիվ, դատավորի նկատմամբ այսօր կիրառել է կարգապահական պատասանատվության ամենախիստ միջոցը՝ լիազորությունների դադարեցումը։

Արաքս Մամուլյան