08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Հյուսիսային Կորեայի անօդաչուները հատել են Հարավային Կորեայի սահմանը․ դրոններից մեկը մինչև Սեուլ է հասել
Քաղաքականություն
26.12.2022 | 18:24
Հյուսիսային Կորեայի անօդաչու թռչող սարքերը խախտել են Հարավային Կորեայի օդային տարածքը Կյոնգի նահանգի սահմանամերձ շրջաններում։ Այս մասին հայտնել է Հարավային Կորեայի շտաբների պետերի միացյալ կոմիտեն, գրում է BBC-ի ռուսական ծառայությունը։
Նշվում է, որ անօդաչուներից մեկը թռել է Սեուլից հյուսիս։ Հարավային Կորեայի զինվորականները հայտարարել են, որ մի քանի նախազգուշական կրակոց են արձակել, ապա օդ են բարձրացրել կործանիչներն ու ուղղաթիռները, սակայն անօդաչու սարքերը խոցելու փորձերը մինչ այժմ անհաջող են եղել:
Հարավային Կորեայի զինվորականները նկատել են սահմանը հատող անօդաչու սարքերը տեղական ժամանակով մոտավորապես 10:30-ին։ Հարավային Կորեայի ռազմական KA-1 թեթև ինքնաթիռը, որը մասնակցել է կասեցման գործողությանը, վթարվել է, սակայն երկու օդաչուները կարողացել են փրկվել։ Ինքնաթիռն ընկել է թռիչքից անմիջապես հետո՝ Սեուլից արևելք գտնվող Հոենսոնում։
Հարավային Կորեայի ռազմական պաշտոնյաներից մեկը վերջին ներխուժումն անվանել է Փհենյանի բացահայտ սադրանք:
Հիշեցնենք, որ վերջին անգամ հյուսիսկորեական անօդաչու թռչող սարքը հատել էր սահմանը հինգ տարի առաջ՝ 2017 թվականի հունիսին, երբ երկու Կորեաների միջև լարվածությունը գագաթնակետին էր հասել։
Էմմա Չոբանյան
