16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Կարմիր խաչի միջոցով Արցախ ուղարկված 10 տոննա սնունդն ու դեղորայքը փոխանցվել են տեղի բուժհաստատություններին
25.12.2022 | 19:10
Կարմիր խաչի մեքենաներով Հայաստանից այսօր 10 տոննա հումանիտար բեռ (սնունդ և դեղորայք) է ուղարկվել Արցախ։ ԿԽՄԿ հայաստանյան պատվիրակության հաղորդակցության ծրագրերի ղեկավար Զառա Ամատունին Factor.am-ի հետ զրույցում ասաց, որ տեղափոխությունը տեղի է ունեցել կողմերի համաձայնությամբ՝ ԿԽՄԿ բեռնատարով և արդեն փոխանցվել է տեղի բժշկական հաստատություններին։
Զառա Ամատունին նաև ասաց, որ այսօր ԿԽՄԿ միջնորդությամբ Հայաստան է տեղափոխվել տարբեր քրոնիկական հիվանդություններով 4 օտարերկրյա քաղաքացի։
«Թե՛ իրենց դիմումի, թե՛ իրենց երկրի ներկայացուցիչների դիմումների հիման վրա, տեղի կառույցների հետ համաձայնեցված նրանք դուրս են բերվել»,- նշեց Ամատունին։
Հիշեցնենք՝ երեկ Կարմիր Խաչի միջազգային կոմիտեի մեքենայով Արցախից Հայաստան է տեղափոխվել 4 ամսական երեխա:
Արցախը շրջափակման մեջ է արդեն 14 օր։ Քաղաքացիական հագուստներով մի խումբ ադրբեջանցիներ բնապահպանական կեղծ պատրվակով դեկտեմբերի 12-ից փակել են Ստեփանակերտ-Գորիս մայրուղին: Դրա հետևանքով ընդհատվել է Շուշիի շրջանի Լիսագոր, Մեծ Շեն, Հին Շեն և Եղցահող գյուղերի տրանսպորտային կապը մայրաքաղաք Ստեփանակերտի հետ։ Ադրբեջանի կողմից Արցախը Հայաստանին և աշխարհին կապող միակ ճանապարհը՝ Լաչինի միջանցքը, արգելափակելու պատճառով 1100 քաղաքացիական անձինք, որից 270-ը՝ անչափահաս, չեն կարողանում վերադառնալ տուն։
Արփի Հակոբյան
