Կարմիր խաչի ավտոմեքենան Արցախ կվերադառնա դեղորայքով բեռնված

Ծանր վիճակում գտնվող չորս ամսական երեխային Արցախից Հայաստան տեղափոխած Կարմիր խաչի ավտոմեքենան դատարկ չի վերադառնա։ ԿԽՄԿ պատվիրակության հաղորդակցման ծրագրերի ղեկավար Զառա Ամատունին Factor.am-ին տեղակացրեց, որ պայմանավորվածություն է ձեռք բերվել, որ մեքենան Արցախ կվերադառնա դեղորայքով բեռնված.

«Արցախում այս պահին հումանիտար ճգնաժամ է, դեղորայքի խիստ անհրաժեշտություն կա, ուստի՝ մեր միջնորդությամբ համաձայնություն կա, որ մեքենան Արցախ դեղորայք կհասցնի։ Այս պահին հստակ չեմ կարող ասել, թե ավտոմեքենան երբ Արցախ կհասնի, սակայն մենք դա կազմակերպում ենք հնարավորինս արագ»,- ասաց Ամատունին։

Նշենք, որ Արցախը Հայաստանին կապող միակ ճանապարհը Ադրբեջանի կողմից արգելափակելու պատճառով ԱՀ առողջապահության նախարարության «Արևիկ» բուժմիավորումում «ընդերային լեյշմանիոզ» ախտորոշմամբ 4 ամսական երեխան օրեր շարունակ գտնվում է ծանր վիճակում։ Այսօր Կարմիր Խաչի միջազգային կոմիտեի միջնորդությամբ և ուղեկցությամբ երեխան տեղափոխվել է ՀՀ մասնագիտացված բժշկական կենտրոն։

Հիշեցնենք՝ իրենց «անկախ բնապահպաններ» կոչող մի խումբ ադրբեջանցիներ դեկտեմբերի 12-ից փակ են պահումլ Արցախը Հայաստանին կապող միակ ճանապարհը։ 1100 քաղաքացի, որից 270-ը՝ անչափահաս, տուն վերադառնալու հնարավորություն չունի: Միջանցքը փակ է նաև շտապօգնության մեքենաների համար։ Հիվանդանոցները չեն ստանում անհրաժեշտ բժշկական ապրանքներ ու դեղորայք, մթերային խանութների դարակները կիսադատարկ են։

Միջազգային հանրությունը, մեծ թվով պետությունների արտաքին գերատեսչություններ և իրավապաշտպան կազմակերպություններ, ՄԱԿ-ի Անվտանգության խորհրդի անդամ երկրների ներկայացուցիչներ պահանջում են անմիջապես վերացնել արգելափակումը, որը մարդասիրական ճգնաժամ է առաջացրել Լեռնային Ղարաբաղում:

Ռոզա Վարդանյան