Դատական իշխանությունը շարունակում է զավթվել ՔՊ-ի կողմից․ խախտվում են հիմնարար սկզբունքներ․ Արծվիկ Մինասյան․ ՏԵՍԱՆՅՈՒԹ

«Մեկուկես տարի առաջ նախաձեռնվեց այսպես կոչված մի «բարեփոխում», որն այսօր հետադարձ փոփոխության է ենթարկվում. խոսքը «կալանքի դատարանների» մասին է»,- խորհրդարանում այս մասին նշեց ԱԺ «Հայաստան» խմբակցության քարտուղար Արծվիկ Մինասյանը՝ անդրադառնալով Դատական օրենսգրքում փոփոխություններ կատարելու վերաբերյալ կառավարության նախաձեռնությանը:

Մինասյանը նշեց, որ 2021 թվականի փետրվարի 3-ին իշխող կուսակցության պատգամավորներն ընդունում էին «կալանքի դատարանների» մասին նախագիծը՝ բարձրաձայն հայտարարելով, թե դատարանների արդյունավետության բարձրացման, ծանրաբեռնվածությունը թուլացնելու համար են անում: «Այսօր ուղիղ հակառակ հիմնավորումներով բերում և վերացնում եք այդ դատարանները: Լավ եք անում, որովհետև այդ դատարանները, ինչպես այն ժամանակ բարձրաձայնում էինք, ստեղծվել էին մեկ նպատակով՝ ծառայեցնել սեփական քաղաքական ուժի դեմ պայքարող անձանց նկատմամբ կալանքի կիրառմանը: Փաստը և հիմնավորումները շատ հստակ են»։

«Այս փաթեթով նաև խոշարագույն մի «բարեփոխում» է բերվում ԱԺ՝ կասեցված դատավորներին ուղարկում են ռեզերվ՝ չսպասելով, որ այդ դատավորի նկատմամբ ընթացող դատական գործն արդարացման հիմքով կարող է կարճվել՝ դատավորին հանում են դատավորի կարգավիճակից»,-հայտարարեց Մինասյանը՝ հավելելով, թե նման քայլերով ոտնահարվում է մարդու հիմնարար իրավունքները՝ անմեղության կանխավարկածը, օրենքի հետադարձ ուժի կիրառման նորմը:

«Լավ, արդարադատությունն այս աստիճան բռնաբարելու ցանկությունը, ձգտումը, կամքը, պահանջը ե՞րբ է ավարտվելու: Երբ, որ դատական համակարգը դառնա ՔՊ իշխանության կամակատա՞րը»,- հարց հնչեցրեց պատգամավորը՝ կարծիք հայտնելով, թե  ՔՊ վարչության որոշումներով են արդեն դատավորներ նշանակվում, քանի որ ԱԺ մեծամասնությունն ոչ մի այլընտրանքային տարբերակ չի դիտարկում:

«Այս դատական «բարեփոխումներ» կոչվածը ևս մեկ անգամ հաստատում է, որ Հայաստանի Հանրապետությունում դատական իշխանությունը շարունակում է զավթվել «Քաղաքացիական պայմանագիր» կուսակցության կողմից»,- ընդգծեց ընդդիմադիր պատգամավորը։

Մանրամասները՝ տեսանյութում։