03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Լաչինի միջանցքը փակած ադրբեջանցիները դժգոհել են ՄԱԿ-ի ԱԽ նիստում ելույթների կապակցությամբ
Քաղաքականություն
21.12.2022 | 16:34
Ադրբեջանի նախագահ Իլհամ Ալիևի հրահանգով Լաչինի միջանցքն արդեն 10 օր արգելափակած ադրբեջանցի «ցուցարարներն» ու «էկոակտիվիտները» քաղաքական հայտարարություն են տարածել՝ դժգոհելով ՄԱԿ-ի Անվտանգության խորհրդի նիստում հնչած ելւոյթներից։
Մասնավորապես, հայտարարության մեջ ասվում է, որ «որպես ոչ կառավարական կազմակերպությունների ներկայացուցիչներ (միջանցքը փակած բոլոր ՀԿ-ը գործում են պետական կառույցներին կից)՝ մտահոգված են նրանով, որ դեկտեմբերի 20-ին ՄԱԿ-ի ԱԽ նիստում մի շարք երկրներ միակողմանի, կողմնակալ են եղել, քննարկումները չեն արտացոլել տեղում իրականությունը»։
«Անընդունելի է, որ Հայաստանը և Ֆրանսիան, որը ՄԱԿ-ի Անվտանգության խորհրդի մշտական անդամ է, միակողմանիորեն չարաշահում են այս հարթակը, մոլորեցնում են միջազգային հանրությանը և իրականացնում կեղտոտ քարոզչություն»,- ասվում է հայտարարության մեջ։
Ի դեպ, Ֆրանսիայից զատ՝ Ադրբեջանին Լաչինի միջանցքը բացելու հասցեական կոչ են ուղղել մի շարք երկրներ, այդ թվում՝ ԱՄՆ-ը, Իռլանդիան, Նորվեգիան, սակայն Բաքվի քարոզչամեքենան իրեն հատուկ ոճով շարունակում է թիրախավորել Փարիզին։
Բացի այդ, ադրբեջանցիների հայտարարության մեջ կրկին անհիմն մեղադրանքներ կան Հայաստանի հասցեին։
Ալիևի ցուցարարները համառորեն շարունակում են նաև պնդել, թե, իբր, չեն փակել Լաչինի միջանցքն ու Արցախը չեն պահում շրջափակման մեջ։
Էմմա Չոբանյան
