«Արգիշտի Ղազարյանը լքեց ԱԺ դահլիճը․դա հարգանքի բացակայություն է». Կոնջորյանը դատավորի թեկնածուի մասին․ ՏԵՍԱՆՅՈՒԹ

ՀՀ ազգային ժողովն արտահերթ նիստում քննարկում է Վճռաբեկ դատարանի վարչական պալատի դատավորի թափուր տեղի համար առաջադրված թեկնածուների ընտրության հարցը:

Բարձրագույն դատական խորհուրդը Վճռաբեկ դատարանի վարչական պալատի դատավորի թափուր տեղի համար առաջադրել է Արման Թովմասյանի, Վահագն Թորոսյանի և Արգիշտի Ղազարյանի թեկնածությունները:

Ներկայացված 3 թեկնածուներից ԱԺ-ն պետք է ընտրի Վճռաբեկ դատարանի վարչական պալատի դատավորի թեկնածու:

Ընդդիմադիր «Հայաստան» խմբակցությունը հայտարարեց, որ չի մասնակցելու հարցի քննարկմանը։ «Նկատի ունենալով, որ օրակարգի հաջորդ հարցերը վերաբերում են պաշտոնների նշանակմանը, իսկ դրանք մեկ քաղաքական ուժի կողմից կատարվող նշանակումներ են, «Հայաստան» խմբակցությունը չի մասնակցելու քվեարկությանը»,- նշեց խմբակցության քարտուղար Արծվիկ Մինասյանը։ Ընդդիմադիր պատգամավորները լքեցին նիստերի դահլիճը:

ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը, անդրադառնալով ընդդիմության բոյկոտին՝ նշեց, որ ընդդիմադիր պատգամավորների տրամաբանությունն անհասկանալի է․ «Տարրական տրամաբանությունը հուշում է, որ եթե ցանկանում եք, որ մեկ քաղաքական ուժի կողմից չլինի ընտրությունը, ապա կարող եք մնալ և կլինի 2 կամ երեք քաղաքական ուժի կողմից ընտրություն»։

Հայկ Կոնջորյանն անդրադարձավ նաև ԱԺ դահլիճից Վճռաբեկ դատարանի վարչական պալատի դատավորի թեկնածուի հեռանալուն։ «Արգիշտի Ղազարյանը լքեց ԱԺ դահլիճը․ դա հարգանքի բացակայություն է ԱԺ ինստիտուտի նկատմամբ»,- ընդգծեց ԱԺ «Քաղաքացիական պայմանագիր» խմբակցության ղեկավարը՝ հավելելով, որ թեկնածուն դեռևս պետք է եզրափակիչ ելույթ ունենար։

Մանրամասները՝ տեսանյութում։