Դատավոր Սերգեյ Չիչոյանն ասում է, որ Վարդազարյան-Ջհանգիրյան զրույցից տեղյակ չի եղել․ ՏԵՍԱՆՅՈՒԹ

Վճռաբեկ դատարանի հակակոռուպցիոն պալատի կոռուպցիոն հանցագործությունների քննության կազմն այժմ  գործում է երեք դատավորով:  Այս քանակից պակաս դատավորների թվով  պալատը գործել չի կարող: Դատավորներից մեկը՝ Սերգեյ Չիչոյանը  նախկինում եղել է Գեղարքունիքի մարզի ընդհանուր իրավասության դատարանի դատավոր, մյուս դատավորը՝ Արտակ Կրկյաշարյանը եղել է Քննչական կոմիտեի նախագահի տեղակալ, իսկ դատավոր Կարեն Բիշարյանը եղել է դատախազ: Չի բացառվում, որ այս անձինք իրենց նախկին պաշտոնների բերումով առնչված լինեն այն գործերին, որոնք այժմ փոխանցվել են Վճռաբեկ դատարանի հակակոռուպցիոն պալատ:

Դատավորների ընդհանուր ժողովին մասնակցող դատավոր Սերգեյ Չիչոյանից հետաքրքրվեցինք, թե Հակակոռուպցիոն կազմն ինչպե՞ս է վարվում, երբ դատավորներից մեկն առնչված է լինում պալատին փոխանցված գործին։ Չիչոյանն ի պատասխան նշեց, որ նման դեպքերում  այլ դատարան ստեղծելու անհնարինության հիմքով դատավորը պետք է ինքնաբացարկ չհայտնի:

«Բայց առայժմ այդպիսի դեպք չի եղել»,- ասաց Սերգեյ Չիչոյանը:  Նշենք, որ վերջերս դատավոր Դավիթ Գրիգորյանի գործը, որը, հիշեցնենք, Հայաստանի երկրորդ նախագահ Ռոբերտ Քոչարյանին ազատ արձակած դատավորն է, մակագրվել է դատավոր Կարեն Բիշարյանին:

Կարեն Բիշարյանը եղել է Ռոբերտ Քոչարյանի գործով դատախազ, իսկ դատավոր Դավիթ Գրիգորյանի նկատմամբ  քրեական գործ է հարուցվել Քոչարյանին ազատ արձակելուց հետո: Հանրության շրջանում քննարկվել է այն հարցը, որ Դավիթ Գրիգորյանի նկատմամբ քրեական հետապնդումը հարուցվել է Քոչարյանին ազատ արձակելու համար,  այլ ոչ թե պաշտոնեական կեղծիք կատարելու համար, ինչպես նշվում էր նրա մեղադրանքում:

Չիչոյանից հետաքրքրցեցիք՝ արդյոք վերը նշված հանգամանքներն օբյեկտիվ դիտորդի մոտ կասկած չի հարուցի դատավոր Դավիթ Գրիգորյանի գործով Բիշարյանի անաչառության վերաբերյալ։ Հարցին ի պատասխան Չիչոյանը կրկնեց, որ տվյալ դեպքում ինքնաբացարկ չի եղել:

Չիչոյանը վկայի կարգավիճակով հարցաքննվել է ԲԴԽ նախկին նախագահ Ռուբեն Վարդազարյանի և ԲԴԽ նախագահի ժամանակավոր պաշտոնակատար Գագիկ Ջհանգիրյանի խոսակցության գործի շրջանակներում: Մեր հարցին՝  ի՞նչ ցուցմունք է տվել Չիչոյանը, վերջինս պատասխանեց, որ «այլ թեմա է եղել», ինքը Ջհանգիրյան-Վարդազարյան խոսակցությունից տեղյակ չի եղել:

Մանրամասները՝ տեսանյութում։

Արաքս Մամուլյան