07.08.2026 | 15:50
Գարեգին Բ կաթողիկոսը՝ դատարանի առաջ. ինչ իրավիճակ է Էջմիածնում․ ՈՒՂԻՂ
Հնդկաստանում ցուցադրվել է Ջիվան Ավետիսյանի «Թևանիկ» ֆիլմը
Մշակույթ
16.12.2022 | 18:39
Հնդկաստանի Նոիդա քաղաքի (ՈՒտտար Պրադեշ նահանգ) կինոավանում դեկտեմբերի 8-10-ը տեղի է ունեցել «Marwah Studios» կինոարտադրող ընկերության կողմից կազմակերպված թվով 15-րդ կինոփառատոնը («Global Film Festival Noida»):
Ինչպես հայտնում են ՀՀ Արտաքին գործերի նախարարությունից, դեկտեմբերի 10-ին կինոփառատոնի շրջանակներում ցուցադրվել է ռեժիսոր Ջիվան Ավետիսյանի «Թևանիկ» գեղարվեստական ֆիլմը։
Մինչ ցուցադրությունը «Marwah Studios»-ի ղեկավար և փառատոնի կազմակերպիչ, դոկտոր Սանդիփ Մարվահը, Բոլիվուդի կինոքննադատ Վարուն Գուպտան, ՀՀ դեսպանության դիվանագետներ Վլադիմիր Պողոսյանը և Տիգրան Գրիգորյանը հարցազրույցի միջոցով հնդիկ հանդիսատեսին են ներկայացրել հայ կինոռեժիսորի ֆիլմը։
Խոսելով «Թևանիկ» ֆիլմի մասին՝ Վլադիմիր Պողոսյանը նշել է, որ վերջինիս միջոցով ռեժիսորը կարողացել է ինքնատիպ ձևով ներկայացնել հայկական մշակույթը, հայ մարդու պայքարը, հայ ընտանիքը և նրա կենցաղը՝ նկատելով, որ հնդկական ֆիլմերը մշտապես ցուցադրվել են Հայաստանում, և հավելել, որ այս միջոցառումն իր բնույթով կարելի է բացառիկ համարել, քանի որ այն իր հերթին հնարավորություն է տալիս հայկական կինոարտադրությունը ներկայացնել հնդիկ հանդիսատեսին։
Իր հերթին Սանդիփ Մարվահը հայտնել է, որ փառատոնի համար ներկայացվել են թվով 18 երկրների շուրջ 100 ֆիլմեր, սակայն կազմակերպիչները ընտրել են միայն 18 ֆիլմ, որոնց մեջ է ընդգրկվել նաև «Թևանիկ» ֆիլմը։
