Ստամբուլցիների գրեթե կեսը կարծում է, որ ընդդիմադիր քաղաքապետին դատել են քաղաքական դրդապատճառներով

Թուրքական MetroPOLL Research-ի կողմից անցկացված հարցման համաձայն՝ Ստամբուլի բնակիչների 44,8 տոկոսը կարծում է, որ Ստամբուլի քաղաքապետ Էքրեմ Իմամօղլուի դատավարությունը զրպարտության գործ չէ, ինչպես պնդում է կառավարությունը, այլ քաղաքական դրդապատճառներ ունի, գրում է Stockholm Center for Freedom-ը։

Չորեքշաբթի թուրքական դատարանը Իմամօղլուն դատապարտել էր 2 տարի 7 ամիս ազատազրկման ընտրական հանձնաժողովի անդամներին վիրավորելու համար։ MetroPOLL-ը հրապարակել է հարցման արդյունքները, որի համար նոյեմբերի 15-ից 20-ն ընկած ժամանակահատվածում ընդհանուր առմամբ հարցվել է 2122 մարդ՝ Իմամօղլուի դատավարությունը զրպարտության համար էր, ինչպես պնդում էին, թե՝ քաղաքական դրդապատճառներով վարույթ։

Հարցվածների 44,8 տոկոսը ասել է, որ գործը «քաղաքական» է, 30,9 տոկոսն ասել է, որ ոչինչ չգիտի դրա մասին, միայն 17,6 տոկոսն է ընդունել կառավարության պնդումը, որ դա «զրպարտության գործ է»:

Եթե Իմամօղլուի դատավճիռը հաստատվի բարձրագույն մարմնի կողմից, Իմամօղլուն կարող է զրկվել իր պաշտոնից՝ քաղաքական գործունեություն ծավալելու հնգամյա արգելքի պատճառով։ Հավելենք, որ 2023 թվականին Թուրքիայում կայանալիք նախագահական ընտրություններում Իմամօղլուն գործող նախագահ Ռեջեփ Թայիփ Էրդողանի հիմնական մրցակիցներից է։ Տարբեր սոցհարցումների համաձայն՝ նա գերազանցում է Էրդողանին և ունի ընտրություններում հաղթելու լրջագույն հնարավորություն։

Այսպիսով, Էրդողանն իր ճանապարհն ազատում է լրջագույն մրցակցից։ Իմամօղլուի դեմ, որը ներկայացնում է CHP-ն, գործ էր հարուցվել  2019 թվականի քաղաքային ընտրություններից հետո։ Նա հաղթել է և՛ առաջին ընտրություններում, որոնք տեղի էին ունեցել մարտի 31-ին, սակայն ԿԸՀ-ն չեղարկել էր, և՛ երկրորդում՝ հունիսի 23-ին, ընդ որում, երկրորդը՝ զգալի առավելությամբ։ Ընտրություններում հաղթելուց հետո Իմամօղլուն մարտի 31-ի ընտրությունները չեղարկողներին «հիմար» էր անվանել։

Էմմա Չոբանյան