30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
ՄԻՊ-ն ընդունել է ՀՀ-ում դիվանագիտական առաքելությունն ավարտող ԱՄՆ դեսպան Լին Թրեյսիին
Քաղաքականություն
15.12.2022 | 21:04
ՀՀ մարդու իրավունքների պաշտպան Քրիստիննե Գրիգորյանը դեկտեմբերի 15-ին ընդունել է ՀՀ-ում դիվանագիտական առաքելությունն ավարտող ԱՄՆ դեսպան Լին Թրեյսիին: Այս մասին հայտնում են ՄԻՊ գրասենյակից։
Պաշտպանը շնորհակալություն է հայտնել դեսպանին համագործակցության ու աջակցության համար՝ շեշտելով, որ ՄԻՊ-ը հետայսու ևս բաց է համագործակցության հարցում։
Դեսպանն իր հերթին կարևորել է Գրիգորյանի կողմից կատարած աշխատանքները՝ ընդգծելով, որ ՄԻՊ-ի թիմն, իր աշխատանքը կատարելիս, օգտագործում է միջազգային լավագույն փորձը: Դեսպանը հատկապես կարևորել է պատերազմական հանցագործությունների փաստերի ամրագրման ու կոմունիկացման հարցում հաստատության կատարած աշխատանքը։
Պաշտպանն ընդգծել է ՄԻՊ-ի աշխատակազմի նվիրվածությունը մարդու իրավունքների պաշտպանության բնագավառում։ Գրիգորյանի խոսքով` հաստատությունը կարողանում է լավագույնս պահպանել ազգային հաստատությունների համար միջազգայնորեն սահմանված ստանդարտները իրավունքների պաշտպանության բոլոր բնագավառներում։
Գրիգորյանը նշել է, որ գնահատում են ԱՄՆ դեսպանատան աջակցությունը, նաև ներկայացրել է ԱՄՆ վերջերս կատարած իր այցի մանրամասները։
Զրուցակիցները խոսել են նոր ձևավորված ՄԻՊ-ին առընթեր 2 խորհուրդների՝ Կանանց իրավունքների հարցերով հասարակական խորհրդի և Երեխաների և երիտասարդների իրավունքների պաշտպանության հարցերով հասարակական խորհուրդի մասին, կարևորել խորհուրդներում մարզերի կանանց ու երեխաների ներգրավվածությունը։
Հանդիպման վերջում դեսպանը հաջողություն է մաղթել Գրիգորյանին, հույս հայտնել, որ Պաշտպանի հաստատության ու ԱՄՆ դեսպանատան համագործակցությունը լավագույնս կշարունակվի նաև Հայաստանում ԱՄՆ նորանշանակ դեսպանի պաշտոնավարման ժամանակ։ Պաշտպանը շնորհակալություն է հայտնել դեսպան Թրեյսիին Հայաստանում իրականացրած իր առաքելության համար։
