30.10.2026 | 14:36
Պենտագոնը Բալթյան երկրներին խնդրում է մեղմել ՌԴ-ից սպառնալիքի վերաբերյալ հռետորաբանությունը․ Reuters
Աշխարհում ռեկորդային թվով լրագրողներ են բանտարկված․ Թուրքիան գլխավոր իրավախախտների թվում է
Քաղաքականություն
15.12.2022 | 23:30
Լրագրողների պաշտպանության կոմիտեն (CPJ) պարզել է, որ ռեկորդային թվով լրագրողներ են ներկայում բանտարկված ամբողջ աշխարհում, իսկ Թուրքիան բանտարկողների թոփում է, գրում են թուրքական լրատվամիջոցները։
2022 թվականի դեկտեմբերի 1-ի դրությամբ՝ 363 լրագրողներ գտնվում էին կալանքի տակ։ Իրանը, Չինաստանը, Մյանմարը, Թուրքիան և Բելառուսը բանտարկված լրագրողների թվով առաջին հորիզոնականներում են։
Թուրքիայում բանտարկված լրագրողների թվի զգալի աճ է գրանցվել, հայտարարել է CPJ-ն՝ նշելով, որ 2022 թվականին երկրում պահվող լրագրողների թիվը 18-ից հասել է 40-ի, իսկ ահաբեկչության մեղադրանքով ձերբակալվել է 25 քուրդ լրագրող։ Թուրքիայում քուրդ լրագրողները հաճախ ենթարկվում են իրավական ոտնձգությունների, դատավարությունների և բանտարկության՝ քրդական խնդիրների և Քուրդիստանի աշխատավորական կուսակցության մասին հաղորդումների համար։
Կոմիտեն նշում է, որ չնայած այս տարվա բանտարկված լրագրողների թվի աճին՝ Թուրքիայում բանտարկված լրագրողների թիվը դեռ ավելի քիչ է, քան 2016-ի հեղաշրջման փորձից հետո։ Այնուամենայնիվ, Թուրքիայի անկախ մամուլը շարունակում է թուլացած մնալ կառավարության հետապնդումներից, գերիշխող դիրքերից և լրագրողների բռնի աքսորից կամ մասնագիտությունից հեռանալու պատճառով։
Կոմիտեն նաև նախազգուշացնում է, որ Թուրքիայում վերջին ձերբակալությունները կարող են ազդարարել մամուլի ազատության դեմ նոր հարձակում հաջորդ տարվա ընտրություններից առաջ՝ հաշվի առնելով ԶԼՄ-ների մասին նոր օրենքը, որը պահանջում է ազատազրկում ապատեղեկատվություն տարածելու համար:
Էմմա Չոբանյան
