Մրցակցության պաշտպանության հանձնաժողովի, ԱՄՆ արդարադատության դեպարտամենտի և Հայաստանում ԱՄՆ դեսպանության համագործակցությամբ ԱՄՆ առևտրի դեպարտամենտի Առևտրային իրավունքի զարգացման ծրագրի (CLDP) շրջանակում Երևանում դեկտեմբերի 14-15-ը անցկացվել է «Հակամրցակցային համաձայնությունները և համակենտրոնացումները Հայաստանում» թեմայով աշխատաժողով: Այս մասին տեղեկանում ենք ՄՊՀ մամուլի ծառայությունից։
Աշխատաժողովին մասնակցել են ՄՊՀ անդամները, Հայաստանում ԱՄՆ դեսպանատան, ԱՄՆ առևտրի, արդարադատության, հակամրցակցային համաձայնությունների դեպարտամենտների ներկայացուցիչներ, պաշտոնատար այլ անձինք:
ՄՊՀ անդամ Շուշան Սարգսյանը, ողջունելով աշխատաժողովի մասնակիցներին, շնորհակալություն է հայտնել ծրագրի պատասխանատուներին՝ ներդրված ջանքերի համար և ընդգծել, որ հակամրցակցային համաձայնություններն ու համակենտրոնացումները տնտեսական մրցակցության ոլորտի առանցքային հարցերից են, որոնք հանձնաժողովի մշտական ուշադրության կենտրոնում են գտնվում: ՀՀ-ում ԱՄՆ դեսպանատան քաղաքական/տնտեսական բաժնի ղեկավար Էլիսոն Հենան հույս է հայտնել, որ աշխատաժողովի ընթացքում մասնակիցները կկատարելագործեն հակամրցակցային համաձայնությունների և համակենտրոնացումների նկատմամբ վերահսկողության իրենց պրակտիկ հմտությունները:
ՄՊՀ ներկայացուցիչներն աշխատաժողովի ընթացքում ներկայացրել են Հայաստանում հակամրցակցային համաձայնությունների ընթացիկ պետական կարգավորումներին և կիրարկմանը, ինչպես նաև համակենտրոնացումներին առնչվող հիմնահարցերը, ԱՄՆ առևտրի դեպարտամենտի պատասխանատուները՝ ԱՄՆ հակամրցակցային համաձայնությունների վերաբերյալ գործերում ընթացակարգային և կիրակման հարցերը, համակենտրոնացումների օրենսդրությունը, կարգավորումները և կիրարկումը, առանձին ուշագրավ վարույթներ և այլն:
