Պարո՛ն Փաշինյան, Կրեմլի հետ կո՛շտ խոսիր․ Պուտի՛ն, երաշխավո՞ր ես, պարտքդ կատարիր․ կկռվենք մինչև վերջ՝ ԼՂ-ն չենք հանձնի․ Լևոն Բարսեղյան․ ՏԵՍԱՆՅՈՒԹ

Նիկոլ Փաշինյանն այսօր Կառավարության նիստում Բաքվին մեղադրեց նոյեմբերի 9-ի հայտարարության «ուղղակի և կոպիտ» ոտնահարման մեջ, ասելով՝ հումանիտար իրավիճակը Լեռնային Ղարաբաղում ծայրաստիճան սրվել է։ Բնակիչները զրկված են ազատ տեղաշարժի իրավունքից, հազարավոր մարդիկ, այդ թվում՝ երեխաներ, ձմռան ցուրտ պայմաններում մնացել են ճանապարհներին, բազմաթիվ ընտանիքներ ակամա կիսվել են՝ հայտնվելով շրջափակման տարբեր կողմերում, առողջական ծանր խնդիրներ ունեցող քաղաքացիները զրկվել են դեղորայքից և առողջապահական ծառայություններից, խափանվել են պարենի և առաջին անհրաժեշտության այլ ապրանքների մատակարարումները։

«Ասպարեզ» ակումբի խորհրդի նախագահ Լևոն Բարսեղյանը Factor TV-ին տված հարցազրույցում այս իրադրության առաջին պատասխանատու է որակում Ռուսաստանին, որի նախագահն է նոյեմբերի 9-ի հայտարարության տեքստի հեղինակը և երաշխավորը նրա կետերի կատարման, իսկ Լաչինի միջանցքի անխափան աշխատանքը պետք է կարգավորվեր այդ փաստաթղթով։

Լևոն Բարսեղյանը թերի է որակում Փաշինյանի մեղադրանքները՝ ուղղված Ալիևին՝ պնդելով, որ ՀՀ Կառավարության ղեկավարը նաև Պուտինի անունը պիտի տա։

«Վլադիմիր Պուտինը խախտում է իր պարտավորություները։ Ռուս խաղաղապահները պետք է մտնեն ադրբեջանցի ամբոխի մեջ՝ բացեն միջանցքը։ Գիտենք, որ Ալիևը թշնամի է, մշտապես դեֆոլտ ռեժիմով պետք է մեղադրել և քննադատել, բա ՌԴ-ին ասելիք չունե՞ք, պարո՛ն Փաշինյան։ Կոշտ հայտարարություն է պետք ուղղել Կրեմլին, որ քո զորքն ադրբեջանցիների հետ Լաչինի միջանցքում կանգնած ֆուտբոլ է դիտում։ Փաշինյանը պետք է Պուտինին ասի՝ չե՞ք իրականացնում ձեր պարտքը, ասեք՝ իմանանք, թե ինչ ենք անելու, միայն իմացեք՝ չենք հանձնելու Արցախը, կոտորածի չենք հանձնելու ժողովրդին, կռվելու ենք մինչև վերջ, դու երաշխավո՞ր ես, թե՞ ոչ։ Ո՞վ պետք է դա ասի, պարո՛ն Փաշինյան»,- հարց ուղղեց Լևոն Բարսեղյանը։

Հարցազրույցն ամբողջությամբ՝ տեսանյութում։

Ռոբերտ Անանյան