Աջակցում ենք մեր տաղանդավոր մարզիկներին․ դրամական աջակցության չափերը կկրկնապատկվեն․ ՏԵՍԱՆՅՈՒԹ

Չեմպիոն դարձած մարզիկներին տրվող միանվագ գումարները կկրկնապատկվեն։ Այսօր Կառավարության նիստի ընթացքում այս մասին հայտնեց ԿԳՄՍ նորանշանակ նախարար Ժաննա Անդրեասյանը։

Նախարարի խոսքով՝ ներկայացվող նախագծով նախատեսվում է աշխարհի առաջնությունում 1-3-րդ տեղեր զբաղեցրած մարզիկները, համապատասխանաբար, 5, 3,5 և 2 մլն դրամ մրցանակների փոխարեն կստանան 10, 7 և 4 մլն դրամ: Ազգային հավաքական թիմերի գլխավոր մարզիչները և մեդալակիր մարզիկների անձնական մարզիչները 2,5, 1,75 և 1 մլն դրամի փոխարեն կստանան, համապատասխանաբար, 5, 3,5 և 2 մլն դրամ, ազգային թիմերի 2-րդ մարզիչները՝ 1 մլն, 700 հազար և 400 հազար դրամի փոխարեն կստանան 1 մլն, 1,4 մլն և 800 հազար դրամ:

Եվրոպայի առաջնություններում 1-3 տեղերը զբաղեցրած մարզիկները կկրկնապատկեն իրենց մրցանակները՝ 3 մլն, 1,8 մլն և 1,2 մլն դրամի փոխարեն ստանալով 6, 3.6 և 1.4 մլն դրամ: Համապատասխանաբար կկրկնապատկվեն նաև մարզիչների գումարները: Գումարները ներառում են վճարվող հարկերն ու տուրքերը:

«2022 թվականին Եվրոպայի և աշխարհի առաջնություններում ՀՀ-ը ներկայացնող մարզիկները ցուցաբերել են աննախադեպ արդյունք, դեռևս 2022 թվականի դեկտեմբերի 6-ի դրությամբ մենք ունեինք արդեն 298 մեդալ, որից 103-ը՝ ոսկե, 69-ը՝ արծաթե և 126 բրոնզե: Ասեմ, որ այս պահի դրությամբ արդեն 300-ի սահմանագիծը հատել ենք, որովհետև այս օրերին ևս համապատասխան մրցաշարեր են գրանցվում: Մինչ այս ամենաբարձր արդյունքը գրանցել էինք 2019 թվականին, երբ մարզիկները նվաճել էին 22 մեդալ»,- նշեց Անդրեասյանը:

Նախարարը նաև տեղեկացրեց, որ չզեկուցվող հարցերի փաթեթով Կառավարությունը հավանություն է տվել նաև մեկ այլ նախագծի, որի արդյունքում «Տարվա լավագույն մարզիկներ» մրցույթի հաղթողներին վճարվող գումարները կավելանան. յուրաքանչյուրին կտրամադրվի 6 մլն 330 հազար, ներառյալ հարկերն ու տուրքերը: Հարկերը ու տուրքերը վճարելուց հետո յուրաքանչյուր մարզիկ կստանա 5 մլն դրամ:

Մանրամասները՝ տեսանյութում։