Արքայախնձոր աճեցնողները կապացուցեն, որ իրենց գործը պակաս կարևոր չէ, քան ծրագրավորողներինը․ Թունյանը՝ ՏՏ ոլորտին աջակցություն տրամադրելու մասին․ ՏԵՍԱՆՅՈՒԹ

Առաջարկվում է ՏՏ ոլորտին հարկային արտոնության տեսքով պետական աջակցության տրամադրումը երկարացնել ևս 1 տարով՝ մինչև 2023 թ. դեկտեմբերի 31-ը ներառյալ: Այս մասին նշել է ՀՀ բարձր տեխնոլոգիական արդյունաբերության նախարարի տեղակալ Դավիթ Սահակյանը՝ ԱԺ տնտեսական հարցերի մշտական հանձնաժողովում ներկայացնելով Կառավարության հեղինակած ««Տեղեկատվական տեխնոլոգիաների ոլորտի պետական աջակցության մասին» օրենքում փոփոխություններ և լրացում կատարելու մասին» և «ՀՀ հարկային օրենսգրքում փոփոխություն կատարելու մասին» օրենսդրական փաթեթը:

Նշենք, որ 2015 թ. ուժի մեջ մտած օրենքով տեղեկատվական տեխնոլոգիաների ոլորտի նոր ստեղծվող, սկսնակ տնտեսավարող սուբյեկտներին տրամադրվում են հարկային արտոնություններ, մասնավորապես, շահութահարկի 0 տոկոս դրույքաչափի և եկամտային հարկի 10 տոկոս դրույքաչափի կիրառմամբ:

Նախարարությունը, հաշվի առնելով ոլորտի զարգացման գերակայությունները և տվյալ պահին ոլորտին պետական աջակցություն ցուցաբերելու անհրաժեշտությունը, մշակելու և Կառավարության քննարկմանն է ներկայացնելու աջակցության նոր ծրագրեր:

«Եթե արտոնությունը հետագայում ավելի մեծ արդյունք է ապահովելու, այդ արտոնությունը պետք է տրվի»,- նշեց ԱԺ տնտեսական հարցերի մշտական հանձնաժողովի նախագահ , «Քաղաքացիական պայմանագիր» խմբակցության պատգամավոր Բաբկեն Թունյանը։

Պատգամավորը միաժամանակ ընդգծեց, որ  քննադատություն կա այն առնչությամբ, որ մեկ ոլորտի՝ ՏՏ ոլորտին չափից դուրս ուշադրություն է դարձվում։

«Օրինակ՝ արքայախնձոր, արքայանարինջ աճեցնող կազմակերպությունները, որոնք հայտնվել են դժվարին վիճակում, եթե հանդիպում կազմակերպենք ՏՏ ոլորտի ներկայացուցիչների հետ,  կապացուցեն, որ իրենց գործը պակաս կարևոր չէ, քան ծրագրավորողներինը»,- ասաց Թունյանը՝ ընդգծելով, որ ցանկացած արտոնության ներքո պետք է վերլուծություն լինի։

Մանրամասները՝ տեսանյութում։