30.10.2026 | 09:35
Հայաստանի գավաթում հայտնի են քառորդ եզրափակիչի բոլոր մասնակիցները
Մունդիալ-2022. Ֆրանսիան երկրորդ անգամ անընդմեջ դուրս եկավ եզրափակիչ
15.12.2022 | 09:35
Ֆուտբոլի աշխարհի առաջնության կիսաեզրափակիչի երկրորդ խաղում մրցեցին Ֆրանսիան և Մարոկկոն:
«Արմենպրես»-ի հաղորդմամբ՝ «Ալ-Բայտ» մարզադաշտում կայացած խաղի մեկնարկում Ֆրանսիան պարզապես որսաց իր պահը: Հանդիպման 4-րդ րոպեին ճիշտ ժամանակին, ճիշտ տեղում հայտնվեց Տեո Էրնանդեսը և գրավեց Մարոկկոյի դարպասը: Բաց թողած գնդակից հետո, Մարոկկոն մի քանի լավ հնարավորություն ուներ վերականգնելու հաշվի հավասարությունը, բայց ապարդյուն: Աֆրիկյան աշխարհամասի ներկայացուցիչները փորձում էին «առաջին համարով» խաղալ, բայց Ֆրանսիան արժանիորեն էր կրում Մունդիալի գործող չեմպիոնի կոչումը: Առաջին կեսի վերջնամասում Մարոկկոն մեծ ուժերով էր գրոհում: Ի վերջո թիմերն ընդմիջման գնացին ֆրանսիացիների նվազագույն առավելությամբ:
Երկրորդ կեսի մեկնարկում Մարոկկոն տիրել էր նախաձեռնության ու իրար հաջորդող գրոհներով ամեն կերպ ձգտում էր վերականգնել հաշվի հավասարությունը: Ֆրանսիան հստակ էր գործում պաշտպանությունում: Այստեղ ևս գործեց ֆուտբոլի չգրված օրենքը՝ չես խփում դու, խփում են քեզ: Ֆրանսիայի ընտրանու երկրորդ գնդակը 79-րդ րոպեին հեղինակեց Կոլո Մուանին: Ֆրանսիա–Մարոկկո՝ 2:0:
Ֆուտբոլի աշխարհի առաջնության երրորդ տեղի համար խաղում Մարոկկոն կմրցի Խորվաթիայի ընտրանու հետ: Այդ հանդիպումը կկայանա դեկտեմբերի 17-ին և կմեկնարկի Երևանի ժամանակով 19:00-ին: Մունդիալի եզրափակիչում Ֆրանսիան կմրցի Արգենտինայի հետ: Խաղը կկայանա դեկտեմբերի 18-ին (Երևանի ժամանակով 19:00-ին):
