30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Ադրբեջանի ԱԳՆ-ն արձագանքել է Ֆրանսիայի, ԱՄՆ-ի և ԵՄ-ի՝ Լաչինի միջանցքը բացելու մասին հայտարարություններին
Քաղաքականություն
14.12.2022 | 20:20
Ադրբեջանի ԱԳՆ մամուլի ծառայության ղեկավար Այխան Հաջիզադեն արձագանքել է Ֆրանսիայի ԱԳՆ-ի, ԱՄՆ Պետքարտուղարության ու ԵՄ արտաքին քաղաքական ծառայության հայտարարություններին, որով գերատեսչությունները կոչ են անում Բաքվի իշխանություններին՝ դադարեցնել Լաչինի միջանցքի արգելափակումն ու Արցախում հումանիտար ճգնաժամը։
Նա, մասնավորապես, կրկին Հայաստանին է մեղադրել, իբր, նոյեմբերի 9-ի եռակողմ հայտարարությամբ ստանձնած պարտավորությունները չկատարելու մեջ ու շարունակել խեղաթյուրել փաստաթղթերը։ Հաջիզադեն նշել է, որ վերանշյալ երկրները կողմնակալ վերաբերմունք են դրսևորում։
Նա նշել է, որ, իբր, Ադրբեջանի «քաղհասարակության ներկայացուցիչների և բնապահպան ակտիվիստների» կողմից իրականացված բողոքի ակցիան «ադրբեջանական հանրության դժգոհության օրինական արտահայտման արդյունք է ապօրինությունների հետ կապված», և քաղաքացիական հասարակության այդ դիրքորոշմանը պետք է հարգանքով վերաբերվել։
Ադրբեջանը, որը մարդու իրավունքների ու քաղաքացիական ազատությունների մասով աշխարհում վերջին հորիզոնականներն է զբաղեցնում, որտեղ նույնիսկ թույլ չեն տալիս միայնակ պիկետներ անցկացնել, Բաքվի իշխանությունները խոսում են, իբր, ակտիվիստների ու քաղաքացիական հասարակության մասին։
Հիշեցնենք, որ արդեն երրորդ օրն է՝ Ադրբեջանի իշխանություններն արգելափակել են Լաչինի միջանցքը։
Էմմա Չոբանյան
