Մեր նախագիծը մերժվել է․ ընդդիմադիր պատգամավորները բոյկոտեցին Լաչինի միջանցքի հարցով ԱԺ նիստը․ ՏԵՍԱՆՅՈՒԹ

«Քիչ առաջ ԱԺ խորհրդի նիստ է գումարվել, որի ժամանակ մերժվել է ԱԺ արտահերթ նիստում քննարկել ընդդիմադիր խմբակցությունների ներկայացրած նախագիծը՝ Ադրբեջանի ցեղասպան քաղաքականության և Լաչինում ստեղծված իրավիճակի կապակցությամբ»,- այս մասին ԱԺ-ում հայտարարեց «Հայաստան» խմբակցության քարտուղար Արծվիկ Մինասյանը՝ հավելելով, որ ԱԺ արտահերթ նիստում քննարկվում է «Քաղաքացիական պայմանագիր» խմբակցության առաջարկած նախագիծը։

«Մեր գնահատմամբ` ՔՊ–ի այս հայտարարության տեքստն ավելի լավ է` չարվի, քանի որ այն ոչ միայն վնասում է Արցախին ու Հայաստանին, այլ նաև օգնելու է թուրք-ադրբեջանական տանդեմին։ Մեր խմբակցությունը չի մասնակցի հարցի քննարկմանը»,- նշեց Մինասյանը։

«Պատիվ ունեմ» խմբակցության քարտուղար Տիգրան Աբրահամյանը նշեց, որ իրավիճակը բավականին բարդ է՝ Արցախում ոչ միայն հումանիտար ճգնաժամ է, այլ Արցախը կանգնած է նոր պատերազմի և ցեղասպանության շեմին։ Պատգամավորը տեղեկացրեց, որ իրենք նույնպես չեն մասնակցի նիստին և իրենց տեսակետը ժողովրդին կներկայացնեն 16։00-ին՝ կառավարության շենքի դիմաց։

Ընդդիմադիր պատգամավորները լքեցին ԱԺ դահլիճը՝ բոյկոտելով ատահերթ նիստը։

Նշենք, որ ընդդիմադիր խմբակցությունները հանդես էին եկել արտահերթ նիստ հրավիրելու նախաձեռնությամբ, սակայն նրանց ներկայացրած հայտարարության նախագծի որոշ դրույթների վերաբերյալ ՔՊ-ն առարկություններ էր ներկայացրել: Խոսքը մասնավորապես վերաբերում է Արցախի ինքնորոշման իրավունքի իրացման մասին դրույթին:

Հիշեցնենք, որ դեկտեմբերի 12-ին ժամը 10։30-ի սահմաններում, ադրբեջանական կողմը խախտելով 2020 թվականի նոյեմբերի 9-ի եռակողմ համաձայնագրի դրույթները, բնապահպանական պատճառաբանություններով փակել է Արցախն աշխարհին կապող միակ ճանապարհը` ոտնահարելով քաղաքացիական բնակչության կենսական շահերն ու իրավունքները: Նշենք նաև, որ Ադրբեջանը երեկվանից դադարեցրել է Արցախի Հանրապետության գազամատակարարումը:

Մանրամասները՝ տեսանյութում։