16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ռուս խաղաղապահները ուժ կիրառելու մանդատ ունեն. Արծվիկ Մինասյան․ ՏԵՍԱՆՅՈՒԹ
Քաղաքականություն
14.12.2022 | 12:17
«Հայաստան» խմբակցության քարտուղար Արծվիկ Մինասյանը ոչ բավարար է գնահատում ՌԴ խաղաղապահների գործողությունները՝ Ադրբեջանի կողմից Լաչինի միջանցքի փակելու հետ կապված։ Այս մասին լրագրողների հետ ճեպազրույցում հայտարարեց Մինասյանը՝ պատասխանելով հարցին, թե ինչպես է գնահատում ՌԴ խաղաղապահների գործողությունը:
«Ոչ բավարար եմ գնահատում: Հարկավոր է շատ ավելի կոշտ միջոցներ կիրառել:
Ուժ կիրառելու մանդատը կա և այդ մանդատը գալիս է մարդու հիմնարար իրավունքների ապահովման հրամայականից, և այդ մանդատը Ռուսաստանն ունի նաև որպես ՄԱԿ-ի անվտանգության խորհրդի անդամ, ունի նաև որպես ԵԱՀԿ Մինսկի համանախագահության անդամ և ի վերջո ունի նաև որպես 2020 թվականի նոյեմբերի 9-ի եռակողմ հայտարարության կարևորագույն երաշխավորներից մեկը:
Այդ մանդատը կա և այն պետք է շատ ավելի ամրացվի, բայց այդ մանդատի ամրացման համար Հայաստանի պաշտոնական տեսակետն էլ պետք է օգնի»,- ասաց ընդդիմադիր պատգամավորը։
Նշենք, որ ընդդիմությունը Լաչինի միջանցքում ստեղծված իրավիճակի շուրջ այսօր արտահերթ նիստ է հրավիրում։ Երեկ նախագիծ է ներկայացվել «Քաղաքացիական պայմանագիր» խմբակցությանը։ Նախագիծը վերաբերում է Ադրբեջանի կողմից Լաչինի միջանցքը պարբերաբար փակելուն և սադրիչ գործողություններին, Արցախը շրջափակելուն, արցախահայությանը ցեղասպանական քաղաքականությամբ հարենազրկելու Ադրբեջանի վարքագիծը դատապարտելուն, ինչպես նաև միջազգային հանրությանը կոչ ուղղելուն և ռուս խաղաղապահ զորակազմին զորակցություն հայտնելուն ու նրանցից ավելի կոշտ արձագանք ակնկալելուն։
Հիշեցնենք՝ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Ադրբեջանը երեկ անջատել է նաև Արցախի ամբողջ տարածքի գազամատակարարումը։
Մանրամասները՝ տեսանյութում։
