Զելենսկին կոչ է արել Ռուսաստանին մինչև Սուրբ Ծնունդ սկսել զորքերը դուրս բերել Ուկրաինայից

Ռուսաստանը կարող է սկսել իր զորքերն Ուկրաինայից դուրս բերել Սուրբ Ծննդյան օրը և դրանով իսկ ցույց տալ ագրեսիայից հրաժարվելու իր կարողությունը։ G-7-ի առաջնորդներին այս մասին ասել է Ուկրաինայի նախագահ Վլադիմիր Զելենսկին, գրում է BBC-ի ռուսական ծառայությունը։

«Մենք Ռուսաստանին առաջարկում ենք կոնկրետ, բովանդակալից քայլ կատարել դիվանագիտական կարգավորման ուղղությամբ, ինչի մասին այնքան հաճախ են խոսում Մոսկվայում։ Առջևում միլիարդավոր մարդկանց կողմից նշվող տոներն են՝ Սուրբ Ծնունդ՝ Գրիգորյան օրացույցով, Նոր տարի, Սուրբ Ծնունդ՝ Հուլյան օրացույցով։ Սա այն ժամանակն է, երբ նորմալ մարդիկ մտածում են խաղաղության, այլ ոչ թե ագրեսիայի մասին։ Ես առաջարկում եմ, որ Ռուսաստանը գոնե փորձի ապացուցել, որ ունակ է հրաժարվել ագրեսիայից։ Ճիշտ կլինի այս Սուրբ Ծնունդին սկսել ռուսական զորքերի դուրսբերումը Ուկրաինայի միջազգայնորեն ճանաչված տարածքից»,- ասել է նա։

Նա հավելել է, որ եթե Ռուսաստանն իրականացնի զորքերի դուրսբերումն Ուկրաինայից, ապա կապահովվի նաև ռազմական գործողությունների հուսալի դադարեցում։

«Հուսով եմ, որ դուք կաջակցեք մեր կոչին, որովհետև սա գլոբալ շահ է: Եվ սա մեր խաղաղության բանաձևի մի մասն է: Օկուպանտը պետք է հեռանա: Դա, անշուշտ, տեղի կունենա: Եվ ես պատճառ չեմ տեսնում, որ Ռուսաստանը դա չանի հիմա՝ Սուրբ Ծնունդին»,- դիմելով աշխարհի առաջատար տերությունների առաջնորդներին՝ ասել է Ուկրաինայի նախագահը։

G7-ի առաջնորդները երկուշաբթի տեղի ունեցած առցանց հանդիպման ժամանակ, որին մասնակցել է Զելենսկին, պայմանավորվել են շարունակել աջակցել Ուկրաինային, այդ թվում՝ ֆինանսապես՝ պաշտպանելու նրա ինքնիշխանությունը:

Խոսելով ռուսական ագրեսիայից պաշտպանվելու անհրաժեշտության մասին՝ Զելենսկին խնդրել է G7-ին Ուկրաինային տրամադրել հրթիռային հրետանի և հեռահար հրթիռներ։

«Ռուսաստանը դեռևս առավելություն ունի հրետանու և հրթիռների հարցում, դա փաստ է։ Մեզ պետք են ավելի շատ հեռահար հրթիռներ և ավելի շատ հրթիռային հրետանի: Որքան արդյունավետ լինենք նման զենքի հարցում, այնքան ավելի կարճ կլինի ռուսական ագրեսիան»,- ասել է նա։

Միաժամանակ, Ուկրաինայի նախագահը նույնպես բանակցությունների պատրաստակամություն է հայտնել։

«Այժմ մենք հնարավորություն ենք տեսնում օգտագործել դիվանագիտությունը՝ մեր ամբողջ ժողովրդի և մեր տարածքների ազատագրմանը մոտենալու համար»,- ասել է Վլադիմիր Զելենսկին։

Տաթև Ֆռանգյան