«Սուպերվարչապետ» բառից եկեք հրաժարվենք․ վարչապետի լիազորությունների մեջ պետք է լինի նմանատիպ կառույցների կառավարման լայն հնարավորություն․ Անդրանիկ Քոչարյան․ ՏԵՍԱՆՅՈՒԹ

«Եկեք կրակելու մասին չխոսենք։ Այս դահլիճը կրակոցներ տեսել է։ Եթե հոկտեմբերի 27-ին Վազգեն Սարգսյանի մոտ զենք լիներ, հաստատ նա չէր կրակի»,- այս մասին Ազգային ժողովում նշեց «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ անդրադառնալով «Հայաստան» խմբակցության քարտուղար Արծվիկ Մինասյանի դիտարկմանը, որ ներկայացված օրենսդրական փոփոխության պարագայում «եթե վարչապետը զենքը պահի մեկի վրա ու փորձի գյուլել, ՊՊԾ-ն կսատարի նրան»:

Նշենք, որ ԱԺ արտահերթ նիստի օրակարգի հարցերից է «Հատուկ պետական պաշտպանության ենթակա անձանց անվտանգության ապահովման մասին» օրենքում փոփոխությունների փաթեթը, որով պետական պահպանության ծառայությունը կառանձնացվի ԱԱԾ մարմիններից և կդառնա առանձին՝ վարչապետին ենթակա մարմին, իսկ պաշտոնաթող վարչապետերի և նախագահների համար պետական պահպանությունն այժմ գործող կարգով նախատեսված ցմահի փոխարեն կտրամադրվի 7 և 10 տարի ժամկետով, որից հետո դա կնախատեսվի վարչապետի որոշմամբ։ ԱԺ նախագահի ընտանիքի անդամներին ևս պետական պահպանություն կտրամադրվի:

«Պետք է «ԿաԳեԲե»-ի ստվերից դուրս գալ, բարեփոխումներ պետք է իրականացնենք»,- նշեց Քոչարյանը՝ հավելելով, որ Հայաստանն այժմ ունի հսկայական ռեսուրներ ու  հնարավորություններ արտաքին հետախուզություն ստեղծելու համար։

Պատգամավորի կարծիքով՝ պետք է հրաժարվել «սուպերվարչապետ» բառից․ « «Սուպերվարչապետ» բառը չի բնորոշում մեր պետական կառավարման համակարգը, վարչապետի կառավարման մեջ պետք է լինի նման կառույցների օպերատիվ կառավարման լայն հնարավորություն, բոլոր երկրներում այդպես է և մեզ մոտ էլ այդպես պետք է լինի»։

Մանրամասները՝ տեսանյութում։