20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Ուկրաինան ԱՄՆ-ից կասետային մարտագլխիկներ է խնդրում, սակայն Սպիտակ տունը չի շտապում դրանք տալ․ CNN
Քաղաքականություն
08.12.2022 | 13:15
Ամերիկյան CNN հեռուստաընկերությունը, հղում անելով իր աղբյուրներին, հայտնում է, որ Ուկրաինան ԱՄՆ-ից խնդրում է իրեն տրամադրել կասետային մարտագլխիկներ ռեակտիվ հրթիռային համակարգերի և հրետանային արկերի համար, սակայն նախագահ Ջո Բայդենի վարչակազմը դեռ պատրաստ չէ կատարել այդ ցանկությունը, գրում է BBC-ի ռուսական ծառայությունը։
Մի շարք ուկրաինական և ամերիկյան աղբյուրներ նշում են, որ կասետային մարտագլխիկների մասին խնդրանքն ամենավիճահարույցներից է։ Ամերիկյան վարչակազմի աշխատակիցները մի քանի ամիս է՝ նման հարցումներ են ստանում Կիևից։ CNN-ը նշում է, որ Վաշինգտոնն ամբողջությամբ չի բացառում, որ մատակարարումները կարող են տեղի ունենալ ապագայում, սակայն դրանք համարում է վերջին միջոց, որն անհրաժեշտ է միայն Ուկրաինայի պաշարների վտանգավոր սպառման դեպքում։
Ուկրաինայի կողմից կասետային զինամթերքի ձեռքբերման հիմնական խոչընդոտներից են ԱՄՆ Կոնգրեսի սահմանած սահմանափակումները դրանք արտերկիր տեղափոխելու վերաբերյալ։
Նշվում է, որ նախագահ Ջո Բայդենը կարող է վերացնել Կոնգրեսի արգելքները կասետային զինամթերքի արտահանման համար, սակայն Սպիտակ տունը հասկացնում է, որ դա դժվար թե շուտով տեղի ունենա։
«Հակամարտության ներկա և ապագա փուլերում հաջողության հասնելու՝ Ուկրաինայի կարողությունը ոչ մի կերպ կախված չէ այդ զինամթերքի ստացումից»,- ասել է ԱՄՆ Կոնգրեսի անանուն պաշտոնյան:
Ուկրաինայի համար, ըստ հրապարակման հեղինակների, կասետային մարտագլխիկները կարող են լուծել երկու հիմնական խնդիր․ նախ՝ լրացնել ԱՄՆ-ի կողմից տրամադրված հրթիռային համակարգերի և հրետանու զինամթերքի պակասը, ինչպես նաև հասնել հրետանային հզորությամբ ռուսական բանակի հետ հավասարության:
Մասնավորապես, Կիևը խնդրում է իրեն HIMARS MLRS և 155 մմ հաուբիցների համար կասետային մարտագլխիկներ տրամադրել։
Էմմա Չոբանյան
