30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Մերկելը՝ Ուկրաինայում պատերազմի ավարտի և «Հյուսիսային հոսք 2» գազատարի կառուցմանն իր համաձայնության մասին
Քաղաքականություն
07.12.2022 | 23:05
Ուկրաինայի դեմ Ռուսաստանի պատերազմը կավարտվի բանակցությունների սեղանի շուրջ: Նման կարծիք է հայտնել Գերմանիայի նախկին կանցլեր Անգելա Մերկելը Die Zeit պարբերականին տված հարցազրույցում, փոխանցում է Korrespondent-ը։
Նա դժվարացել է կանխատեսել, թե կոնկրետ ինչպիսին կլինի պատերազմի ելքը։
«Մի օր այն կավարտվի բանակցություններով, պատերազմներն ավարտվում են բանակցությունների սեղանի շուրջ»,- ասել է Մերկելը։
Միաժամանակ, նախկին կանցլերը բացառել է իր մասնակցությունը խաղաղ կարգավորմանը և չի պատասխանել հարցին, թե ի՞նչ հանգամանքներում կարող են բանակցություններ սկսվել։
«Տարբերություն կա թելադրված խաղաղության, որը ես, ինչպես շատ ուրիշներ, չեմ ցանկանում, և միմյանց հետ բարեկամական, բաց քննարկումների միջև»,- հավելել է նա։
Մերկելը նաև բացատրել է, որ համաձայնել է «Հյուսիսային հոսք 2» գազատարի կառուցմանը, քանի որ մերժումը կարող էր վատթարացնել հարաբերությունները Ռուսաստանի հետ։
«Մի կողմից՝ նման մերժումը, զուգորդված մինսկյան համաձայնագրերի հետ, իմ կարծիքով, վտանգավոր կերպով կվատթարացնեին հարաբերությունները Ռուսաստանի հետ, մյուս կողմից՝ էներգետիկ կախվածությունն առաջացավ Նիդեռլանդներից, Մեծ Բրիտանիայից գազի պակասի և Նորվեգիայում արդյունահանման սահմանափակման պատճառով»,- ասել է նախկին կանցլերը։
Նրա խոսքով՝ շինթույլտվության խնդրանքը եղել է ոչ թե կառավարությունից, այլ ձեռնարկություններից։ Մերկելը նշել է, որ Գերմանիան կարող էր գնել ավելի թանկ հեղուկ բնական գազ Կատարից և Սաուդյան Արաբիայից, սակայն դա բացասաբար կանդրադառնա երկրի մրցունակության վրա։
«Այսօր պատերազմի ճնշման տակ հենց դա է արվում, ինչին ես աջակցում եմ, բայց այն դեպքում դա շատ ավելի մեծ քաղաքական որոշում կլիներ»,- բացատրել է Մերկելը:
Տաթև Ֆռանգյան
