Ընտրություն պետք է կատարել ապագայի համար․ Միրզոյանը՝ Հունգարիայի հետ հարաբերությունների մասին․ ՏԵՍԱՆՅՈՒԹ

ՀՀ ԱԳ նախարար Արարատ Միրզոյանը ԱԺ-Կառավարություն հարցուպատասխանի ընթացքում անդրադառնալով Հայաստանի և Հունգարիայի միջև դիվանագիտական հարաբերությունների լիարժեք վերականգնման մասին հարցին, պատասխանեց․ «Ադպիսի պայմանավորվածություն ձեռք է բերվել։ Առիթ ունեցել եմ ասելու, որ տեղի ունեցած իրադարձությունների վերաբերյալ մեր գնահատականը չի փոխվել: Եվ մեր ընկալումները նույնն են։ Հունգարական իշխանությունները հայ սպա Գուրգեն Մարգարյանին սպանած հանցագործին և հունգարական դատարանով դատապարտված հանցագործին չպետք է արտահանձնեին Ադրբեջանին:

Բայց միևնույն ժամանակ այդ իրադարձությունները հիշելով՝ նաև հիշում ենք անցած տարի դեկտեմբերին Հունգարիայի գործադրած ջանքերը 5 հայ ռազմագերիների ազատ արձակման ուղղությամբ: Հունգարական իշխանությունների ներկայացուցիչներն անձամբ հասան Բաքու և 5 ազատ արձակվող գերիների հետ եկան Երևան:

Մենք նաև չենք կարող չնկատել հունգարական իշխանությունների աջակցությունը քովիդի դեմ պայքարի շրջանակներում, սա ևս կյանքեր փրկեց»,- նշեց Միրզոյանը:

Արտգործնախարարը հավելեց, որ կան բազմաթիվ այլ օրինակներ, այդ թվում՝ ֆինանսական աջակցությունը Հայ Առաքելական Եկեղեցուն: Կա համագործակցություն նաև դպրոցների մակարդակում:

«Այս ամենը երբ որ կշեռքի նժարի վրա ենք դնում, կարծում եմ՝ ընտրություն պետք է կատարել ավելի շատ դրականի, ապագայի համար, ինչը և արվել է։ Առաջիկայում կլսեք մեր երկու երկրների կողմից դեսպանների նշանակման մասին»,- նշեց Միրզոյանը:

Մանրամասները՝ տեսանյութում։