Սիմոնյանը՝ Փաշինյան-Ալիև նոր հանդիպման մասին․ ադրբեջանցիները կրկին սադրանք են արել Արցախում․ Լուրեր

• Հայկական կողմը չի բացառում, որ այս ամսվա ընթացքում տեղի կունենա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։ ԱԺ-ում այս մասին ասել է Ազգային ժողովի նախագահ Ալեն Սիմոնյանը:
• Նա նաև նշել է, որ Հայաստանը բացասական է վերաբերվում Լաչինի միջանցքում հենակետեր տեղադրելուն։ Սիմոնյանը ասել է, որ այդ ուղղությամբ աշխատանքներ են տարվում նաև ռուսական կողմի հետ, որովհետև դա ռուսական զորքերի պատասխանատվության գոտի է։
• Արցախի նախագահ Արայիկ Հարությունյանը Ֆրանսիայում հանդիպել է այդ երկրի խորհրդարանի երկու պալատների ներկայացուցիչների հետ և ներկայացրել է նաև Արցախում տիրող հետպատերազմյան իրավիճակը: Նա նշել է, որ Ադրբեջանը ցանկանում է կտրել Լաչինի միջանցքը և վերջին կապը արտաքին աշխարհի հետ՝ խեղդամահ անելով Արցախը: Ըստ Հարությունյանի՝ արցախյան կողմը ցանկանում է, որ Լաչինի միջանցքն ունենա լրացուցիչ միջազգային երաշխիքներ Հայաստանի և արտաքին աշխարհի հետ Արցախի կապն անխափան ապահովելու համար։
• Ադրբեջանցիների խումբը, բնապահպանական խնդիրները որպես պատրվակ բերելով, այսօր կրկին ուղևորվել է Արցախ՝ ռուս խաղաղապահների հետ բանակցությունների։ Նրանց ուղեկցել են ադրբեջանական լրատվամիջոցների ներկայացուցիչները, որոնք տարբեր սադրանքներ են փորձում իրականացնել տեղում, այդ թվում՝ մուտք գործել Արցախի տարածք։ խաղաղապահ զորախմբի հրամանատար Անդրեյ Վոլկովը հայտարարել է, որ տեսախցիկների ու լրագրողների մուտքն արգելված է։

Այս ժամի լուրերը՝ տեսանյութում։