31.10.2026 | 13:06
Արարատ Միրզոյանը մասնակցել է «Մանամայի երկխոսության» բացման արարողությանը
«Մի գիշերով հանկարծակի կգանք»․ Չավուշօղլուն կրկին Հունաստանին սպառնացել է ներխուժմամբ
Քաղաքականություն
07.12.2022 | 16:37
Անկարան սպառնում է նոր էսկալացիայի դեպքում ներխուժել Հունաստանի կղզիներ, եթե Աթենքը դրանք չապառազմականացնի, գրում է ekathimerini-ն։
Մասնավորապես, Թուրքիայի ԱԳ նախարար Մևլութ Չավուշօղլուն հայտարարել է, որ եթե Աթենքը չկատարի Անկարայի պահանջը, Թուրքիան կա՛մ կվիճարկի կղզիների ինքնիշխանությունը, կա՛մ «մի գիշերով հանկարծակի կժամանի»։
Չավուշօղլուն նման հայտարարություններ է արել իր ռումինացի գործընկեր Բոգդան Աուրեսկուի հետ համատեղ մամուլի ասուլիսում՝ պնդելով, որ լարվածության մեղավորն Աթենքն է։ Պատասխանելով Հռոդոսում և Լեսբոսում Հունաստանի կողմից անցկացված զորավարժությունների մասին հարցին՝ Չավուշօղլուն ասել է, որ Աթենքը բարձրացնում է խաղադրույքները։
«Հունաստանը, չնայած հանգամանքներին, բացասական քայլեր է ձեռնարկում մեր անվտանգության համար։ Այն ռազմականացնում է կղզիները։ Ուստի այս քայլերի դիմաց հնարավոր չէ լռել։ Հենց Հունաստանն է խախտում այս ապառազմականացված կղզիների կարգավիճակը։ Կա՛մ Հունաստանը նահանջելու է և հարգելու է այս պայմանագրերը, կա՛մ մենք կանենք այն, ինչ անհրաժեշտ է։ Այդ պատճառով մեր նախագահ Ռեջեփ Թայիփ Էրդողանն ասում է. «Մենք կարող ենք գալ հանկարծակի մի գիշերով»»,- ասել է Չավուշօղլուն։
Պաշտոնյան նշել է, որ Թուրքիան կշարունակի անհրաժեշտ միջոցներ ձեռնարկել ինչպես իրավական դաշտում, այնպես էլ միջազգային կազմակերպություններում, հատկապես՝ ՄԱԿ-ում։
«Հունաստանը պետք է հիշի հետևյալը. նա, ով քամի է ցանում, հնձում է մրրիկ: Եթե դուք խաղաղություն չեք ուզում, մենք կանենք այն, ինչ անհրաժեշտ է։ Հանկարծակի մի գիշեր»,- ասել է Թուրքիայի ԱԳ նախարարը։
Ռումինիայի արտգործնախարար Աուրեսկուն, սակայն, Չավուշօղլուին ասել է, որ Հունաստանի և Թուրքիայի միջև տարաձայնությունները պետք է լուծվեն «խաղաղ երկխոսության» միջոցով։
Հավելենք, որ Էգեյան ծովի Հունաստանի կղզիների շուրջ Աթենքի և Անկարայի հարաբերությունները պարբերաբար լարվում են։
Էմմա Չոբանյան
