Քաղաքականություն
07.12.2022 | 12:50
Ադրբեջանցիների խումբը, բնապահպանական խնդիրները որպես պատրվակ բերելով, կրկին ուղևորվել է Արցախ։ Ադրբեջանական քարոզչամիջոցների ներկայացուցիչները, որոնք ուղեկցում են նրանց, հայտնում են, որ իբր մոնիտոինգային խումբը, արդեն Արցախի Իվանյան համայնքում է, որտեղ գտնվում է ռուս խաղաղապահների հրամանատարությունը։ Հաղորդվում է, որ ադրբեջանական խումբը կազմած է «էկոլոգիայի և բնական պաշարների նախարարության, էկոնոմիկայի նախարարության գույքի հարցերով պետական ծառայության և «ԱզերԳոլդ» փակ բաժնետիրական ընկերության աշխատակիցներից, որոնք ռուս խաղաղապահների հետ քննարկելու են Արցախի հանքերի շահագործման հետ կապված հարցեր»։ Այս պահին տեղեկություններ չկան արդյո՞ք Արցախից որևէ պաշտոնյա մասնակցում է հանդիպմանը։
Ի՞նչ իրավասությամբ են ռուս խաղաղապահները Արցախի տնտեսությանն ու հանքարդյունաբերությանը վերաբերող հարցեր քննարկում ադրբեջանական կողմի հետ՝ պարզ չէ։ Բանն այն է, որ 2020 թ-ի նոյեմբերի 9-ի եռակողմ հայտարարությամբ խաղաղապահները բացառապես պետք է կատարեն անվտանգության ապահովման գործառույթներ։
Հիշեցնենք, որ դեկտեմբերի 3-ին Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ, իբր, բնապահպանական պատճառաբանությամբ փակել էին Ստեփանակերտ-Գորիս մայրուղին։ Նրանց հետ էին նաև Ադրբեջանի պետական ու քարոզչական լրատվամիջոցների ներկայացուցիչները։ Մայրուղին մի քանի ժամ փակ մնալուց հետո բանակցությունների արդյունքում բացվել էր։
Էմմա Չոբանյան
