Մեղադրանքներ եք հնչեցնում, գնացե՛ք դիմեք միջազգային դատարաններ․ Արշակյանը՝ Գալստյանին․ ՏԵՍԱՆՅՈւԹ

«Երեկ Հանրապետության հրապարակում ինքնամոռաց տոն էր: Հանրապետական նշանակության եզակի ճարտարապետական հուշարձանը սեփական պետության պատվերով և կազմակերպմամբ խոշտանգվել էր հազարավոր խորշերով ու հուշարձանի բաց վերքերի վրա կրկեսային վաղանցուկ երջանկության դիմակ էր: Երկնքում էլ էր ցնծություն. ականների պայթյուն ու ֆոսֆորային զենքի թափվող անձրև հիշեցնող հրավառությունն իջնում էր Երևանի վրա, լուսավորելով Եռաբլուրը»,- այս մասին Ազգային ժողովում նշեց ՀՅԴ ԳՄ անդամ, ՀՀ ԱԺ «Հայաստան» խմբակցության պատգամավոր Լիլիթ Գալստյանը։

«Իսկ երկու ամիս առաջ և հիմա էլ պատերազմ է՝ անթաղ դիերով, խոշտանգված սահմաններով: Գուցե, հազարավորների նման, ես էլ այսքան դառնացած չընկալեի, եթե բանակցողը չխոստովաներ, որ այս իրականությունից «ցեղասպանության տպավորություն է ստացվում և Հայաստանը մենակ է ողջ աշխարհի դեմ»։ Ի դեպ, ադրբեջանցիների կողմից Արցախի օկուպացված տարածքներում հայկական մշակութային ժառանգության ոչնչացման առնչությամբ ամիսներ առաջ նամակ եմ հղել ՅՈՒՆԵՍԿՕ-ի գլխավոր տնօրենին և ստացել մի օր մշտադիտարկում կկազմակերպենք անիմաստ մի պատասխան: Կոռուպցիոն խայտառակ սկանդալով վարկաբեկված ՅՈՒՆԵՍԿՕ-ից առանձնապես ակնկալիք չունեմ»,- նշեց Գալստյանը։

Նա հավելեց, որ ակնկալիք չունի նաև մեր լիազոր մարմնից և կարծիք հայտնեց, որ ամենուր դիլետանտիզմ է և ոչ մի պատասխանատվություն:

Նիստը վարող ԱԺ փոխնախագահ Հակոբ Արշակյանն արձագանքեց՝ նշելով, որ ՅՈՒՆԵՍԿՕ-ի մասին ԱԺ ամբիոնից պատգամավորի ելույթը կարող է ընկալվել որպես ՀՀ ԱԺ դիրքորոշում։

«Դուք ՅՈՒՆԵՍԿՕ-ի հասցեին մեղադրանքներ եք հնչեցնում։ Եթե նման մեղադրանքներ ունեք, գնացե՛ք դիմեք միջազգային դատարաններ, բայց խնդրում եմ՝ այս ամբիոնից նման ձևակերպումներով հանդես չգալ»,-ասաց Արշակյանը։

Մանրամասները՝ տեսանյութում։