Լատվիան չեղարկել է «Դոժդ» հեռուստաալիքի հեռարձակման արտոնագիրը՝ «ազգային անվտանգությանը սպառնացող վտանգի» պատճառով

Լատվիայում «Դոժդ» հեռուստաալիքի հեռարձակման արտոնագիրը կչեղարկվի։ Նման որոշում է կայացրել տեղական Էլեկտրոնային լրատվամիջոցների ազգային խորհուրդը։ Խորհրդի ղեկավար Իվարս Աբոլինսն ասել է, որ այս շաբաթ «Դոժդ»-ը պետք է դադարեցնի հեռարձակումը, գրում է BBC-ի ռուսական ծառայությունը։

«Որոշումն ընդունվել է ազգային անվտանգությանը և հասարակական կարգին սպառնացող վտանգի պատճառով։ Գնահատելով խախտումների ամբողջությունը՝ խորհուրդը համոզվել է, որ «Դոժդի» ղեկավարությունը չի հասկանում և չի գիտակցում խախտումների նշանակությունն ու լրջությունը, հետևաբար չի կարող գործել Լատվիայի տարածքում», – ասվում է Աբոլինսի Twitter-ի հայտարարության մեջ:

«Դոժդը» Ռուսաստանում դադարել է գործել մարտի սկզբին՝ այն բանից հետո, երբ երկրում լրագրողները սկսեցին քրեական պատասխանատվության ենթարկվել ՌԴ Քրեական օրենսգրքի «ռազմական կեղծիքների» մասին նոր հոդվածով։ Ավելի ուշ հեռուստաալիքին հաջողվել է աշխատանքի թույլտվություն ստանալ Լատվիայում, որտեղ արգելված են ռուսական պետական ​​հեռուստաալիքները (որպես քարոզչություն)։

Որոշումն ուժի մեջ կմտնի հինգշաբթի՝ դեկտեմբերի 8-ի գիշերը, երբ «Դոժդը» պետք է դադարեցնի հեռարձակումը Լատվիայում։

Հաշվի առնելով, որ «Դոժդ» հեռուստաալիքը հեռարձակվում է ոչ միայն հեռուստատեսությամբ, այլև YouTube հարթակով, NEPLP-ը կխնդրի արգելափակել ալիքն այս հարթակում ևս, որպեսզի բովանդակությունը հասանելի չլինի Լատվիայում, հայտարարել է Աբոլինսը։

«Դոժդի» հաղորդավար Աննա Մոնգաիտի խոսքով՝ ալիքը կշարունակի գործել, կմնա YouTube-ում, բայց կկորցնի կաբելային ցանցերի մի մասը։

«Մենք ի վիճակի ենք հաղթահարել էպիկական չափերի դժվարությունները և մեր առաքելությունը կատարված չենք համարում»,- հավելել է նա։

Ռուսական հեռուստաալիքի հեռարձակումը նախկինում մի քանի անգամ առաջացրել է Լատվիայի վերահսկիչ մարմինների և պաշտոնյաների դժգոհությունը։ Ամենամեծ խնդիրը դարձել է հեռուստահաղորդավար Ալեքսեյ Կորոստելեվի հայտարարությունը, որն արվել է անցած շաբաթ։ Լրագրողն ուղիղ եթերում կոչ անելով գրել մոբիլիզացիայի ժամանակ խախտումների մասին՝ ասել է, որ հեռուստաալիքը կարող է օգնել ռուս զինծառայողներին ռազմաճակատում սպառազինության ապահովման հարցում։

Տաթև Ֆռանգյան