17.08.2026 | 23:08
Զորականում և Ամասիայում շչակներ են փորձարկվելու
Թուրքիան կալանավորել է Շվեդիայի կողմից արտահանձնված քուրդ փախստականին
Քաղաքականություն
05.12.2022 | 15:48
Շվեդիայում նոյեմբերի 22-ին ձերբակալված քուրդ Մահմուդ Թաթին դեկտեմբերի 2-ին արտահանձնել են Թուրքիային, որտեղ նրան կալանավորել են, գրում են թուրքական լրատվամիջոցները։
Թաթը դատապարտվել էր 6 տարի 10 ամիս ժամկետով ազատազրկման՝ Թուրքիայում «ահաբեկչական կազմակերպությանը»՝ Քուրդիստանի աշխատավորական կուսակցությանը (PKK) ենթադրյալ անդամակցելու համար։ Պատիժը կրելուց հետո նա 2015 թվականին տեղափոխվել է Շվեդիա և ապաստան խնդրել, սակայն մերժվել է։
Թուրքական պետական լրատվականները նշում են, որ Թաթին դեկտեմբերի 3-ին տեղափոխել են Ստամբուլի Մետրիս բանտ։
Հավելենք, որ Թուրքիան, Շվեդիան և Ֆինլանդիան հունիսի վերջին հուշագիր են ստորագրել սկանդինավյան երկու երկրների՝ ՆԱՏՕ-ին անդամակցելու հայտերի վերաբերյալ, որը ներառում է Անկարայի՝ «անվտանգության հետ կապված մտահոգությունների» լուծումը։ Երկու երկրները պայմանավորվել են դյուրացնել «ահաբեկչության մեջ» կասկածվողների կամ դատապարտյալների արտահանձնումը Թուրքիային։ Հուշագրից հետո Շվեդիան արդեն մի քանի անձի է արտահանձնել Թուրքիային։
Հավելենք, որ Անկարան Ստոկհոլմի քայլերը բավարար չի համարում, այդ պատճառով դեռևս չի վավերացրել ՆԱՏՕ-ին Շվեդիայի և Ֆինլանդիայի անդամակցության հայտերը։
Էմմա Չոբանյան
