Ադրբեջանում թուրք-ադրբեջանական լայնամասշտաբ զորավարժություններ են անցկացվում․ ԼՈՒՍԱՆԿԱՐՆԵՐ

Ադրբեջանն ու Թուրքիան ռազմական ոլորտում համագործակցության համաձայնագրի շրջանակում համատեղ լայնամասշտաբ զորավարժություններ են անցկացնում, գրում են ադրբեջանական լրատվամիջոցները։Ադրբեջանի ՊՆ-ի հաղորդմամբ՝ զորավարժություններն անցկացվում են տարբեր տիպի զորքերի անձնակազմի, մարտական ​​և հատուկ ինժեներասակրավորական տեխնիկայի, ինչպես նաև Ադրբեջանի բանակի և Թուրքիայի զինված ուժերի ռազմական ավիացիայի ներգրավմամբ։ Վարժանքներն անցկացվում են մայրաքաղաք Բաքվում, Աստարայի, Իմիշլիի շրջաններում և գրավյալ Ջրականում։

Ըստ սցենարի՝ ադրբեջանական բանակի ցամաքային զորքերի, ռազմաօդային ուժերի, հատուկ նշանակության ուժերի, ինժեներական զորքերի, հրթիռահրետանային զորքերի ստորաբաժանումները Թուրքիայի զինված ուժերի զինծառայողների հետ համատեղ իրականացնում են մարտական ​​պատրաստության տարբեր առաջադրանքներ։  Վարժանքներին մասնակցող ստորաբաժանումների առջև խնդիր է դրված  բարելավել համահունչ աշխատանքը, զարգացնել գետերի վրայով պոնտոնային կամուրջների կառուցման, ինչպես նաև պայմանական հակառակորդի խորքում դեսանտի իջեցման հմտությունները։

Ի դեպ, ավելի վաղ՝ հոկտեմբերին, Իրանի զինված ուժերն էին լայնածավալ զորավարժություններ իրականացրել, որը ներառել էր նաև Արաքս գետի վրայով պոնտոնային կամուրջների կառուցումն ու դրանց վրայով զինտեխնիկայի տեղափոխումը։ Հատկապես, այս փաստն էր Ադրբեջանում դժգոհություններ ու մտավախություններ առաջացրել։  Տպավորություն կա, որ այսպիսով Թուրքիան ու Ադրբեջանը պատասխանում են Իրանին։

Էմմա Չոբանյան