Բրյուսելում ինչպե՞ս կարելի է քննարկել սահմանազատման հարցը՝ չունենալով նախկին խորհրդային հանրապետությունների քարտեզը․ Լավրով

«Արևմտյան երկրները, ԵԱՀԿ Մինսկի խումբը ոչնչացնելուց հետո, փորձում են միջամտել Ռուսաստանի Դաշնության միջնորդական ջանքերին՝ բարելավելու Հայաստանի և Ադրբեջանի հարաբերությունները, բայց դա անարդյունավետ է ստացվում»,-  մամուլի ասուլիսի ժամանակ հայտարարել է ՌԴ ԱԳ նախարար Սերգեյ Լավրովը։ Ըստ նրա՝ Ռուսաստանն օգնում է Հայաստանին և Ադրբեջանին սահմանների սահմանազատման հարցում և աջակցելու է Երևանի և Բաքվի միջև խաղաղության պայմանագրի համաձայնեցմանը։

«Զուգահեռաբար մենք նկատում էինք այլ խաղացողների կողմից այս գործընթացներին միջամտելու ջղաձգական փորձեր, որոնց հետ կապված որևէ խնդիր չենք ունեցել։ Միակ բանը, որ մենք նկատել ենք Երևանի և Բաքվի հետ շփումներում, այն է, որ հատուկ ռազմական գործողության մեկնարկից հետո Արևմուտքը Վաշինգտոնի և Փարիզի միջոցով պաշտոնապես հայտարարեց, որ իրենք Ռուսաստանի հետ որևէ տեղ, որևէ ձևաչափով չեն մասնակցելու։ Այսպիսով՝ նրանք հայտարարեցին ԵԱՀԿ Մինսկի խմբի գործունեության ավարտի մասին»,- ասել է Լավրովը մամուլի ասուլիսի ժամանակ։

Ըստ Լավրովի՝ ֆրանսիացիները, ամերիկացիները և Եվրամիությունն, ընդհանուր առմամբ, «փորձում են վերցնել և սեփականաշնորհել Ռուսաստանի մասնակցությամբ կողմերի ձեռք բերած պայմանավորվածությունները»։

«Օրինակ՝ Բրյուսելում սահմանազատման հանձնաժողովի նիստ են անում։ Դե հայերն էլ, ադրբեջանցիներն էլ բարեկիրթ մարդիկ են, գնում են այնտեղ, բայց ինչպե՞ս կարելի է քննարկել սահմանազատման հարցը՝ չունենալով նախկին խորհրդային հանրապետությունների քարտեզը, որոնք գոյություն ունեն միայն Ռուսաստանի գլխավոր շտաբում, ես դժվար եմ պատկերացնում»,- հավելել է նա։

Տաթև Ֆռանգյան