Մեր աշխատանքի տեմպը պետք է փոխենք՝ սկսած ինձնից. Նիկոլ Փաշինյան․ ՏԵՍԱՆՅՈՒԹ

Կառավարությունը 1 միլիարդ 342 միլիոն դրամ է հատկացրել 8 մարզերում սուբվենցիոն ծրագրեր իրականացնելու համար: Կառավարության նիստի ժամանակ համապատասխան նախագիծը ներկայացրեց Տարածքային կառավարման և ենթակառուցվածքների նախարար Գնել Սանոսյանը:

«Ընդհանուր հատկացումները 22 միլիարդ դրամից ավելի են, Կառավարության մասնաբաժինը կազմել է 14 միլիարդ դրամ»,- նշեց Սանոսյանը:

Նշենք, որ սուբվենցիոն ծրագրային հայտերը հիմնականում ուղղված են համայնքներում կապիտալ ներդրումներին` մասնավորապես. համայնքներում փողոցների, այգիների, պուրակների, խաղահրապարակների բարեկարգմանը, համայնքային շենքերի, մշակութային տների, մանկապարտեզների, հանդիսությունների սրահների կառուցմանն ու նորոգմանը, խմելու, կոյուղու, ոռոգման ջրագծերի կառուցմանն ու նորոգմանը և գիշերային լուսավորության անցկացմանը, բնակավայրերի գազաֆիկացմանը, բազմաբնակարան շենքերի ընդհանուր բաժնային սեփականության գույքի նորոգմանը՝ էներգախնայող միջոցառումների կիրառմամբ:

Գնել Սանոսյանի խոսքով՝ դեկտեմբերի 5-ը հայտերի ներկայացման վերջնաժամկետն է, որին կհաջորդեն քննարկումները։ «Բայց բոլորը չեն հասցնի, նախագծեր կան, որ ուշանում են, քանի որ ծրագրերը խոշոր են, նախգծողները ուշացնում են»- նշեց նախարարը։

Վարչապետ Նիկոլ Փաշինյանն արձագանքեց․ «Կարծում եմ՝ ոչ միայն այս ոլորտում, մեր աշխատանքի տեմպը պետք է փոխենք՝ սկսած ինձնից. դա շատ կարևոր է, պետք է մեր տեմպն արագացնենք»։

Մանրամասները՝ տեսանյութում։