Ադրբեջանի ՊՆ-ն շարունակում է ռուս խաղաղապահներից պահանջել Արցախի բնակավայրերը չկոչել հայկական տեղանուններով

Արցախում տեղակայված ռուս խաղաղապահ առաքելությունը նախօրեի տեղեկագրում հաստատել էր Ադրբեջանի զինված ուժերի կողմից հրադադարի ռեժիմի խախտումը։

«Շուշիի շրջանում ադրբեջանական կողմը կրակել է Լեռնային Ղարաբաղի զինված ուժերի դիրքերի ուղղությամբ, ինչի հետևանքով երկու մարդ վիրավորվել է»,-ասված էր հաղորդագրությունում: Նաև նշվում էր, որ խաղաղապահ զորախմբի հրամանատարությունը ադրբեջանական կողմի հետ հետաքննում է այս միջադեպը։

Ադրբեջանի ՊՆ-ն վրդովմունքով է արձագանքել ռուս խաղաղապահների այս հայտարարությանը ու կրկին պահանջել Արցախի հայկական բնակավայրերի հայկական տեղանունները չօգտագործել։ Հավելենք, որ նման հայտարարությունները ադրբեջանական կողմից ամենօրյա բնույթ են  ստացել։

«Ցավալի է ռուսական խաղաղապահ զորախմբի արհամարհական վերաբերմունքը մեր կոչերին։ Ցանկանում ենք ևս մեկ անգամ նշել է, որ ԱՆԸՆԴՈՒՆԵԼԻ Է Ադրբեջանի տարածքում մեր բնակավայրերի հայկական կեղծ անվանումների և Լեռնային Ղարաբաղի տարածք բառակապակցության օգտագործումը»,-ասվում է հայտարարության մեջ, որում ի դեպ, «անընդունելի» բառը գրված է մեծատառերով։

«Կոչ ենք անում Ռուսաստանի Դաշնության խաղաղապահ զորախմբին չօգտագործել այն սխալ արտահայտությունները, որոնք մենք նշել ենք իրենց պաշտոնական տեղեկատվության մեջ, և հուսով ենք, որ այս կոչը լսելի կլինի։ Բացի այդ, մենք պահանջում ենք մեր երկրի անվան ճիշտ նշում քարտեզի վրա, որով նրանք կիսվել են»,-ասվում է ադրբեջանական հայտարարության մեջ։ Ադրբեջանի ՊՆ նաև հերքել է իր իսկ կողմից հրադադարի ռեժիմի խախտման փաստը՝ դա անվանելով «անհիմն ու սուտ»։

Հիշեցնենք նաև,որ նախօրեին էլ  Ադրբեջանի Մեջլիսի պատգամավոր Սիյավուշ Նովրուզովը հայտնել էր,որ խորհրդարանի տարածաշրջանային հարցերով հանձնաժողովը դիմելու է ՌԴ Պետական Դումային  Արցախում ռուս խաղաղապահ առաքելության կողմից հայկական բնակավայրերի հայերերն տեղանուններն օգտագործելու հարցով։

Էմմա Չոբանյան