Ադրբեջանի Մեջլիսը ռուս խաղաղապահների դեմ բողոքով դիմել է ՌԴ Պետդումային․ պատճառը Արցախի բնակավայրերի տեղանուններն են

Ադրբեջանի Միլլի Մեջլիսի տարածաշրջանային հարցերով հանձնաժողովը դիմել է ՌԴ Պետական Դումային  Արցախում ռուս խաղաղապահ առաքելության կողմից հայկական բնակավայրերի հայերերն տեղանուններն օգտագործելու հարցով։ Ադրբեջանական լրատվամիջոցների հաղորդմամբ՝ դիմումի մասին Մեջլիսի լիագումար նիստում հայտարարել է պատգամավոր Սիյավուշ Նովրուզովը։ Նրա խոսքով՝ ռուս խաղաղապահները անհարգալից են վերաբերվում Ռուսաստանի նախագահ Վլադիմիր Պուտինի ստորագրած եռակողմ հայտարարությանը։

«Մեր հանձնաժողովը պատրաստել է դիմում ՌԴ Պետդումայի տարածաշրջանային հարցերով հանձնաժողովին։ Միաժամանակ այն կուղարկվի Ռուսաստանի ՊՆ ու այլ կառույցներ: Եթե նրանք չեն կարող իրենց (նկատի ունի խաղաղապահներին) գործառույթներն իրականացնել, ապա եկեք խնդրենք դադարեցնեն»,-ասել է Նովրուզովը։

Հավելենք, որ վերջին օրերին Ադրբեջանի ՊՆ-ն  Արցախում տեղակայված ռուս խաղաղապահ զորախմբի կողմից  հայկական բնակավայրերի հայկական տեղանունների օգտագործման դեմ արշավ է սկսել։  Ռուս խաղաղապահ զորախմբի ամենօրյա տեղեկագրերի  հրապարկումներից հետո Ադրբեջանի ՊՆ-ն պարբերաբար հայտարարություններ է անում։ Ուշագրավ է, որ հաղոդագրություններին, որոնցում ՌԴ ՊՆ-ն հայտնում է Բաքվի կողմից հրադադարի ռեժիմի խախտման մասին, Ադրբեջանի ՊՆ-ն սովորաբար բովանդակային արձագանք չի հնչեցնում, այլ խոսում միայն տեղանուններից։ Ադրբեջանի ՊՆ առաջին նման հայտարարությանն ի պատասխան  ՌԴ խաղաղապահ զորախումբը պարզաբանում էր տարածել։

Էմմա Չոբանյան