30.10.2026 | 12:22
Սևակ Միքայելյանն ընտրվեց ԿԲ խորհրդի անդամ․ ՏԵՍԱՆՅՈՒԹ
ՌԴ խաղաղապահ առաքելությունն արձագանքել է Ադրբեջանի ՊՆ-ի մեղադրանքներին
Քաղաքականություն
25.11.2022 | 17:35
Արցախում տեղակայված ՌԴ ՊՆ խաղաղապահ ուժերն արձագանքել են իրենց ուղղված Ադրբեջանի պաշտպանական գերատեսչության մեղադրանքներին։ «Ռուսաստանի Դաշնության Զինված ուժերը և Լեռնային Ղարաբաղում ռուսական խաղաղապահ զորախումբը ուսումնամարզական և մարտական առաջադրանքների կատարման ընթացքում օգտագործում են ՌԴ ԶՈՒ ԳՇ տեղագրական քարտեզներով սահմանված տեղանունները։Զարմանք է առաջացնում Բաքվի քննադատությունը Մաղավուզ բնակավայրի անվան առնչությամբ, քանի որ ավելի վաղ բազմիցս ՌԴ ՊՆ տեղեկագրերում օգտագործվել են այլ՝ ոչ ադրբեջանական անվանումները ԼՂ-ի տարածքով Ադրբեջանի քաղաքացիների ավտոշարասյունների ուղեկցումն ապահովելու համատեքստում: Սակայն դա չի բերել տեղեկատվական տարածքում պահանջների արտահայտման։Ավելին, շարասյուների շարժման երթուղին համակարգելիս և ռուս խաղաղապահների հետ փոխգործակցություն կազմակերպելիս ադրբեջանական կողմն օգտագործում է նաև այդ տեղանունները»,-ասվում է ռուս խաղաղապահների թելագրամյան ալիքում տարածված հաղորդագրության մեջ։
Նաև նշվում է, որ ռուս խաղաղապահների գործունեությունը կարգավորվում է 2020թ-ի նոյեմբերի 10-ի ՌԴ-ի, Հայաստանի ու Ադրբեջանի ղեկավարների եռակողմ հայտարությամբ և բազմիցս բարձր գնահատական է ստացել իր արդյունավետության համար Ադրբեջանի պաշտոնատար անձանցից տարբեր հանդիպումներում։
«Ռուսաստանի Դաշնության պաշտպանության նախարարության պաշտոնական տեղեկագրերում հրապարակված հրադադարի ռեժիմի խախտումները արձանագրվում են խաղաղապահների դիտակետերում՝ օգտագործելով օբյեկտիվ հսկողության տեխնիկա, որը թույլ է տալիս դիտորդություն իրականացնել օրվա ցանկացած ժամի: Վատ չէր լինի, որ Ադրբեջանի ՊՆ-ն նման աննշան առիթներով կասկածի տակ չդներ ռուսական խաղաղապահ զորախմբի գործունեությունը Լեռնային Ղարաբաղում, այլ նրա հետ սերտ համագործակցությամբ, այդ թվում՝ տեղում, շարունակեր աշխատանքը՝ պահպանելու խաղաղությունը տարածաշրջանում»,-ասվում է հաղորդագրության մեջ։
Հիշեցնենք, որ Ադրբեջանի պաշտպանական գերատեսչությունն արձագանքել էր ՌԴ ՊՆ-ի հաղորդագրությանը, որով վերջինս հաստատել էր Արցախում ադրբեջանական զինուժի կողմից հրադադարի խախտման փաստը։ Ադրբեջանի ՊՆ-ն ՌԴ ՊՆ-ի հաղորդագրությանն ի պատասխան կոչ էր արել «կանխել հայերի սադրիչ գործողություններն» ու չօգտագործել հայկական բնակավայրերի հայկական տեղանունները։
Էմմա Չոբանյան
