Իշխան Սաղաթելյանի գործունեությունը՝ որպես պատգամավոր, շատ արդյունավետ է․ ժամանակը ցույց կտա՝ ինչ կլինի․ Արծվիկ Մինասյան․ ՏԵՍԱՆՅՈՒԹ

Ազգային ժողովի «Հայաստան» խմբակցության քարտուղար Արծվիկ Մինասյանը լրագրողների հետ զրույցում նշեց, որ մանդատները վայր դրած պատգամավորների քաղաքական հայացքներում ոչինչ չի փոխվել։

Անդրադառնալով դիտարկմանը, որ «Հայաստան» խմբակցության պատգամավոր Իշխան Սաղաթելյանը ևս չի վերադառնում խորհրդարան, և հարցին՝ արդյո՞ք նա ևս մտադիր է մանդատը վայր դնել, Մինասյանը պատասխանեց․ «Նախորդ շրջանում Իշխան Սաղաթելյանը հանդիպումներ է ունեցել Սփյուռքի հայահոծ համայնքներում, այդ թվում՝ նաև պաշտոնատար անձանց հետ։ Այդ հանդիպումմները պատահական չեն։ Դրանք հանդիպումներ են՝ Հայաստանի շահը առաջ տանելու, Հայաստանի և Արցախի առջև ծառացած խնդիրները լուծելու ուղղությամբ։ Եվ շարունակվելու են այսպիսի հանդիպումները։

Մեր գնահատմամբ՝ Իշխան Սաղաթելյանի գործունեությունը, որպես Ազգային ժողովի պատգամավոր, շատ արդյունավետ է։ Երբ որ ՀՀ ԱԺ պատգամավորը, ՀՅԴ գերագույն մարմնի ներկայացուցիչը կարողանում է այդ հանդիպումներն ունենալ, սա շատ ավելի մեծ արժեք է, քան թե ֆորմալ առումով ԱԺ նիստերին մասնակցելը, քվեարկելը կամ քվեարկություններից հրաժարվելը։

Ինչ վերաբերում է ապագային, ժամանակը ցույց կտա, թե ինչպիսի ընթացքի մեջ ենք մենք լինելու։ Բայց այս պահին շատ պարզ է և հստակ՝ մեր հետապնդած նպատակը, ինչպես հայտարարել էինք նախապես, ոչ միայն համայն հայության համախմբումն է Հայաստանի և Արցախի փրկության հարցի շուրջ, այլ նաև առարկայական աշխատանք իրականացնելն է, դա վերաբերում է նաև երկրի ներսում ծավալվող գործունեությանը»,- նշեց Մինասյանը։

Մանրամասները՝ տեսանյութում։