09.10.2026 | 11:13
ՈՒԵՖԱ-ի անդամ բոլոր երկրները միացել են ՖԻՖԱ-ում բարեփոխումների կոչին՝ բացառությամբ Ադրբեջանի
Չնայած ԵՄ պատժամիջոցներին՝ ՌԴ-ն թուրքական «Աքքույու» ԱԷԿ-ի ֆինանսավորման խնդիրներ չունի․ «Ռոսատոմ»
Քաղաքականություն
28.11.2022 | 19:02
ՌԴ-ի դեմ ԵՄ պատժամիջոցները խնդիրներ չեն ստեղծի Թուրքիայի «Աքքույու» ատոմակայանի ֆինանսավորման համար։ Այս մասին «Ատոմէքսպո 2022» 12-րդ միջազգային միջուկային էներգիայի ցուցահանդեսի ժամանակ հայտարարել է ռուսական «Ռոսատոմ» պետական կորպորացիայի ղեկավարի առաջին տեղակալ Կիրիլ Կոմարովը, գրում է Անադոլու գործակալությունը։ Նա հիշեցրել է, որ մոտ 5 գիգավատ հզորությամբ ատոմակայանը միակ տեղանքն է աշխարհում, որտեղ միաժամանակ կառուցվում են 4 ռեակտորներ։
«Սա իսկապես յուրահատուկ իրավիճակ է, և մենք հպարտ ենք դրանով: Շինհրապարակում աշխատանքները շատ դրական են ընթանում»,- ասել է Կոմարովը։ Նա հայտնել է, որ մի քանի օր առաջ շինհրապարակ է այցելել Թուրքիայի խորհրդարանի պատվիրակությունը։
«2023 թվականին պետք է ավարտվեն առաջին էներգաբլոկի կառուցման հիմնական աշխատանքները և միջուկային վառելիքը բեռնվի։ Մենք շատ մոտ ենք նրան, որ Թուրքիան միջուկային տեխնոլոգիաներով երկիր դառնա»,- ասել է Կիրիլ Կոմարովը։
Նա նշել է, որ անկախ աշխարհում ուրանի արժեքից և էներգիայի այլ աղբյուրների գնից, ատոմակայաններում արտադրվող էլեկտրաէներգիան Թուրքիային կարժենա 12 ցենտ։
«Աքքույու»-ն Թուրքիայի առաջին ատոմակայանն է․ այն կառուցվում է Մերսին նահանգում «Ռոսատոմ» ընկերության կողմից։ Ատոմակայանի վերաբերյալ միջկառավարական համաձայնագիրը Թուրքիայի և ՌԴ-ի միջև կնքվել էր 2010 թվականի մայիսին։ Առաջին էներգաբլոկի շահագործումը նախատեսված է 2023թ-ին։
Էմմա Չոբանյան
