Էրդողանի կուսակցությունը դաշնակիցների հետ մերժել է Ստամբուլի պայթյունը հետաքննելու՝ քրդամետ կուսակցության միջնորդությունը

Թուրքիայի իշխող «Արդարություն և զարգացում» (AKP) և նրա դաշնակից «Ազգայնական շարժում» (MHP) կուսակցությունները մերժել են քրդամետ Ժողովուրդների դեմոկրատական կուսակցության (HDP) խորհրդարանական միջնորդությունը՝ հետաքննելու Ստամբուլում նոյեմբերի 13-ին տեղի ունեցած պայթյունը, գրում է Turkish Minute-ը։

Հիշեցնենք, որ նոյեմբերի 13-ին պայթյունի հետևանքով սպանվել է 6 մարդ, վիրավորվել՝ 81-ը։

«Մենք խորհրդարանական միջնորդություն ենք ներկայացրել Թաքսիմի հարձակման հետաքննության համար։ AKP+MHP-ն մերժել է այն»,- Թվիթերում գրել է HDP-ի պատգամավոր Մերալ Դանըշ Բեքթաշը:

Թուրքիան հարձակման համար մեղադրում է Սիրիայում Քուրդիստանի աշխատավորական կուսակցությանը (PKK) և քուրդ զինյալ խմբավորումներին, թեև նրանք հերքում են իրենց առնչությունը ողբերգական միջադեպին:

Ըստ HDP-ի՝ Ստամբուլի պայթյունի հետ կապված բազմաթիվ հարցեր կան, և ավելի հավանական է թվում, որ դա կապված է ԻԼԻՊ-ի կամ Սիրիայում Թուրքիայի կողմից աջակցվող ապստամբ խմբավորումների աշխատանքի հետ: Կուսակցությունը պնդում է, որ ԱԶԿ-ն Ստամբուլի պայթյունն օգտագործում է քրդերի վրա հարձակվելու և երկրում ազգայնական տրամադրությունները 2023-ի ընտրություններից առաջ ուժեղացնելու համար՝ իշխանությունը պահպանելու նպատակով։

Մասնավորապես, կուսակցության հայազգի պատգամավոր Կարո Փայլանը թվիթերյան իր միկրոբլոգում գրել է, որ երկու կուսակցությունները մերժել են իրենց միջնորդությունը, քանի որ չեն ցանկանում՝ ժողովուրդն իմանա, որ Ալբաշիրի երեք եղբայրները սպանվել են ԻԼԻՊ-ի համար կռվելու ժամանակ, և որ նրա եղբայրներից մեկը Թուրքիայի կողմից աջակցվող Սիրիական Ազատագրական բանակի հրամանատարն է։

Փայլանը նկատի ունի Սիրիայի քրդերի գլխավորած «Սիրիայի դեմոկրատական ուժերի» (SDF) գլխավոր հրամանատար Մազլում Աբդիի պնդումը, որը հայտարարել է՝ Ալբաշիրի ընտանիքը կապված է ԻԼԻՊ-ի հետ:

«Նրա եղբայրներից երեքը մահացել են «Իսլամական պետության» համար կռվելիս: Մեկը մահացել է Ռաքքայում, մյուսը՝ Մանբիջում, երրորդը՝ Իրաքում։ Եվս մեկ եղբայր Աֆրինում Թուրքիայի կողմից աջակցվող սիրիական ընդդիմության հրամանատարն է»,- ասել է նա հարցազրույցում։

Էմմա Չոբանյան