Հայաստանը ՀԱՊԿ-ի գործողությունները Երևանի և Բաքվի միջև իրավիճակի մասով ֆիասկո է համարում, բայց կմնա կառույցում․ Պեսկով

Հայկական կողմը Երևանի և Բաքվի միջև հակամարտության հետ կապված ՀԱՊԿ-ի գործողությունները համարում է ֆիասկո։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը «Մոսկվա, Կրեմլ, Պուտին» հաղորդմանը լրագրող Պավել Զապրուբինի հետ զրույցում, գրում են ռուսական լրատվամիջոցները։

«Այո՛, Հայաստանի վարչապետը նեղ ձևաչափով հանդիպմանը ելույթում ասել է, որ հակված է ՀԱՊԿ-ի աշխատանքը Հայաստանի ու Ադրբեջանի միջև իրավիճակի հարցում համարել ֆիասկո։ Դա հայկական կողմի դիրքորոշումն է, հայկական կողմի իրավունքը իրավիճակն այդպես գնահատել»,-ասել է Պեսկովը։

ՀԱՊԿ-ի գագաթնաժողովի արդյունքներն ամփոփելով՝ Պեսկովը նշել է, որ Հայաստանը մնալու է ՀԱՊԿ-ում՝ չնայած ամենը չէ, որ հաջողվել է համաձայնեցնել։ «Իհարկե, մնում է։ Միջոցառումը, չնայած ողջ բարդությանը, չնայած այն բանին, որ, ինչպես ղեկավարներն ասացին իրենց ելույթների ժամանակ, ամեն ինչ չէ, որ համաձայնեցված էր, միջոցառումը ևս մեկ անգամ հաստատեց այս ձևաչափի արդիականությունը, ՀԱՊԿ-ի պահանջվածությունն ու կենսունակությունը»,-ասել է Կրեմլի խոսնակը։

Նա նաև հիշեցրել է, որ ՀԱՊԿ-ն այս տարի կարևոր դերակատարում է ունեցել Ղազախստանում իրավիճակի հանգուցալուծման հարցում։ Պեսկովը նշել է, որ բանակցություններում ՀԱՊԿ երկրների ղեկավարները քննարկել են Հայաստանում խաղաղապահ առաքելության երկարաձգման հարցը, ինչպես նաև Հայաստանի և Ադրբեջանի միջև խաղաղության պայմանագրի ճակատագիրը։

«Այդ թեման շոշափվել է շատ անկեղծ, շատ անմիջական, կառուցողական, ամեն ինչ դեռ համաձայնեցված չէ, կան որոշակի նրբերանգներ»,- ասել է նա ՝ ընդգծելով, որ «այդ թեման օրակարգում է»։

Կրեմլի խոսնակն ասել է, որ Մոսկվան շարունակում է իր միջնորդական դերակատարումը և որ ՀԱՊԿ-ը ևս պահանջված է տվյալ իրավիճակում։

«Շատ կարևոր է, որ Հայաստանն ու Ադրբեջանը համաձայնության գան խաղաղության պայմանագրի շուրջ: Սա է հիմնական խնդիրը: Եվ մենք բոլորս պետք է բոլոր ջանքերը գործադրենք, առանց միմյանց հետ մրցելու, որպեսզի այս խնդիրը կատարվի, օգնել  երկու երկրներին ստորագրել խաղաղության պայմանագիր»,-ասել է նա։ Պեսկովը նաև հայտարարել է, որ պայմանագրի ստորագրման կոնկրետ ժամկետ չկա։

Էմմա Չոբանյան